A Universidade de Santiago reabre o luns ao público o Museo do Templo de Mitra

A Universidade de Santiago de Compostela reabriá ao público o Museo do Templo de Mitra a partir do luns, día 21 de outubro, segundo adiantou este venres o vicerreitor de Coordinación e Planificación do campus de Lugo, Pedro García Herradón.

Un estudante do grao de Ciencias da Cultura na Facultade de Humanidades, que vén de acadar a bolsa creada pola Vicerreitoría de Coordinación e Planificación do campus de Lugo coa finalidade de contar cunha persoa dispoñible para acompañar e explicar aos visitantes as singularidades da ruína, será o encargado de conducir e guiar a todas as persoas que se acheguen a visitar o Museo do Templo de Mitra. O novo horario de apertura establecido pola Universidade de Santiago para canalizar e atender o fluxo de visitantes interesados en coñecer este relevante xacemento romano, antóllase suficientemente amplo, con quendas de mañá e de tarde, para así poder dar resposta e adaptarse ás disposicións horarios de todo o público. Unha vez rematado o proceso de convocatoria da bolsa e xa formalizada a selección da persoa que atenderá a visitas ao Museo do Templo de Mitra, as instalacións deste xacemento romano reabrirán ao público o vindeiro luns día 21, logo de permanecer pechadas deste finais do mes de setembro. As persoas que estean interesadas en coñecer e visitar este xacemento romano poderán facelo os luns, xoves, venres e sábados, en horario de 11.00 a 14.00 horas. Asemade, as instalacións do museo erixido arredor deste templo mitraico, tamén permanecerán abertas ao público os mércores, en horario de 16.00 a 19.00 horas. O Museo do Templo de Mitra, inaugurado a mediados do pasado mes de xullo e aberto ao público días despois, permite aos visitantes coñecer as distintas fases da construción da muralla romana, así como doutras edificacións da época, ademais de facilitar o coñecemento da sociedade da época e a posterior evolución experimentada durante séculos. O vicerreitor de Coordinación e Planificación do campus de Lugo, Pedro García Herradón, valorou como unha “moi boa noticia” a reapertura ao público do Museo do Templo de Mitra, unhas instalacións que xa recibiran varios milleiros de visitantes durante o tempo que permaneceu aberto, ao tempo que agarda que se manteña o interese social e tamén da comunidade científica por coñecer esta ruína. Aínda así, García Herradón, dixo que a decisión adoitada pola Universidade para reabrir este museo é unha “solución transitoria”.