Rodríguez Colmenero, nomeado académico correspondente da Academia Portuguesa da Historia

O arqueólogo Antonio Rodríguez Colmenero, na actualidade profesor ad honorem da Facultade de Humanidades do campus de Lugo, vén de ser nomeado académico correspondente pola Academia Portuguesa da Historia, o máximo recoñecemento que pode recibir no país luso un investigador estranxeiro, a excepción dos brasileiros.

Rodríguez Colmenero, que ao longo dos anos ten acreditada unha ampla traxectoria académica, como catedrático de Historia Antiga da USC, e tamén como investigador, coñeceu a distinción outorgada pola academia lusa a través dunha carta remitida pola presidenta da institución. Manuela Mendoça informou a Rodríguez Colmenero de que o seu nomeamento foi decidido polos académicos de número nunha xuntanza celebrada o pasado verán, ao tempo que lle trasladaba os seus parabéns pola súa entrada na Academia Portuguesa da Historia. O profesor lugués, que deste xeito ve recoñecido o traballo desenvolvido ao longo da súa vida profesional no país luso, tanto para o Ministerio de Cultura como para a Universidade de Braga, e que sempre estivo centrado na investigación da romanización. Rodríguez Colmenero participou, entre outros traballos, en escavacións arqueolóxicas en Aqua Flavia, Vila-Real e Chaves, estudos que lle reportan un profundo coñecemento da riqueza histórica e do proceso de romanización das zonas de referencia, que estiveron moi ligadas a Lugo na época romana. Asemade, este profesor e investigador lugués, tamén estudou a historia da calzada romana denominada Vía Nova, un itinerario entre Aqua Flavia e Astorga que foi unha das grandes vías de comunicación construídas polos romanos para a conexión dos territorios baixo o seu dominio.