O plan formativo do Campus Terra avanza na súa misión de fortalecer as competencias no eido agroalimentario e forestal
A oferta formativa do Campus Terra da USC segue en marcha e coa inscrición aberta para as actividades que se estenden ao longo dos meses de setembro e outubro. Así, o día 23 deste mes e o 3 e 4 de outubro, terá lugar un curso sobre utilización das TIC nos procesos de avaliación e control do plaxio na docencia. Coordinado por María José Iniesto e impartido por Pablo Cear Muñoz Carril e Mª Isabel Dans Álvarez de Sotomayor, ten como obxectivo profundar nos conceptos, ideas previas, alternativas posibles e tipos de avaliacións, ademais de repasar as técnicas, instrumentos e ferramentas TIC que axilicen os procesos de avaliación do persoal docente —cuestionarios, enquisas en liña, rúbricas, ou sistemas de co-avaliación, entre outras— para que poidan enfocarse no ensino. Ademais profundarase en aspectos relacionados co plaxio e o uso da ferramenta Turnitin. A formación impártese a través de Teams.
As posibilidades do cultivo do sabugueiro en Galicia serán obxecto de análise o 30 de setembro, na Escola Politécnica Superior de Enxeñaría da USC. O programa, coordinado polo profesor Julián García Berrios, ofrece 30 prazas e está dirixido a estudantado, docentes e axentes do sector produtivo. Tamén na EPSE, o seminario 'Incendios forestais. Realidade actual e futura dos grandes incendios en España' pretende ser unha ampliación e complemento específico dos coñecementos estudados dentro da materia Rexeneración e Restauración tras incendio que se imparte no mestrado de Enxeñería de Montes. O relator proposto para a actividade formativa, Jorge de las Heras Ibáñez, é catedrático na área de Produción Vexetal na Universidade de Castela A Mancha.
O programa aborda as relacións entre o clima, a meteoroloxía e os incendios, índices de perigo meteorolóxico, cambio climático e incendios forestais; evolución do réxime de incendios en sistemas mediterráneos; respostas da vexetación ante o lume; estratexias para a restauración post-incendio; e o cambio de paradigma na extinción de incendios forestais. Coordinado por María del Pilar González Hernández, a actividade oferta un total de 40 prazas. Finalmente, a terceira edición do seminario ‘Descubre como integrar os teus proxectos cunha plataforma de IOT para impulsar a súa dixitalización’ terá lugar o 17 de outubro e consta de 20 prazas. Ademais, este martes 17 botan a andar as actividades ‘Ferramenta de deseño gráfico para enxeñeiros: AutoCAD Básico’ e ‘Cálculo científico e técnico con Python’.
O plan formativo deseñado polo campus de especialización Campus Terra da USC, financiado pola Consellaría de Educación, Ciencia, Universidades e Formación Profesional, buscan fortalecer as competencias de diversos colectivos da comunidade universitaria do Campus de Lugo así como de profesionais do sector produtivo.