EUniWell leva a cabo un programa de apoio ao desenvolvemento profesional do estudantado de doutoramento na USC
O Campus de Santiago acolle do 19 ao 23 de xaneiro o Programa Intensivo Combinado (BIP) ‘Career Development Support for PhD Students in a Well-Being Environment. From Self-Care to Career: Building Resilient PhD Pathways’, que organiza o Well-Being Center for Doctoral Students and Posdoctoral Researchers da Universidade Europea para o Benestar (EUniWell), no marco da súa oferta formativa para este curso coa colaboración da Escola de Doutoramento Internacional (EDIUS) da USC.
A iniciativa diríxese ao estudantado de doutoramento e céntrase no apoio ao seu desenvolvemento profesional desde unha perspectiva de benestar. O programa aborda o papel do autocoidado na carreira investigadora como elemento clave para a construción de traxectorias profesionais resilientes nesta etapa formativa.
Cunha metodoloxía mixta de obradorios prácticos, visitas a centros de investigación e ecosistemas innovadores, máis dunha ducia de estudantes de doutoramento procedentes das universidades de Nantes (Francia), Semmelweis (Hungría), Linneo (Suecia), Inalco (Francia) e Murcia (España), xunto cunha vintena da USC e catro do Instituto Superior de Administração e Gestão (Portugal), desenvolverán e documentarán competencias como a xestión do tempo, a xestión de proxectos, a comunicación, a colaboración interpersoal e o desenvolvemento dun currículo profesional que lles permita abrir novos camiños mais aló da academia no seu futuro profesional.
A actividade estrutúrase en cinco bloques principais centrados no benestar do estudantado de doutoramento, as carreiras académicas, as oportunidades profesionais alén da academia, as habilidades para a empregabilidade e a planificación da carreira profesional. Este programa ofrece ferramentas concretas para que o doutoramento deseñe o seu itinerario profesional cunha mirada realista e saudable, conectando benestar, competencias e oportunidades.