Un congreso internacional dá “voz e visibilidade” aos emigrantes e refuxiados en Europa na busca de solucións á súa problemática
A análise da situación actual dos emigrantes e refuxiados en Europa, o debate sobre a resposta política e socioeducativa que se está a dar para atender as singularidades que presentan estes colectivos vulnerables e a sensibilización sobre a necesidade de formación técnica para a atención de emigrantes e refuxiados, son tres dos obxectivos do I Congreso Internacional Migración e Refuxio en Europa. Este foro, organizado pola UNED e a USC e que botou a andar este mércores na Facultade de Humanidades de Lugo, busca asemade “dar voz e visibilidade” aos millóns de persoas que se viron obrigadas pola guerra a abandonar os seus países para salvar as súas vidas e agora transitan por Europa na procura de asilo ou refuxio para gozar dunha nova oportunidade.
As directoras deste congreso, que prolongará a súas sesións ata o 28 de outubro e no que formalizaron a súa inscrición 130 persoas, as profesoras da USC, María Dolores Fernández Tilve, e da UNED, María del Pilar Quicios García, salientaron no acto de o carácter académico do I Congreso Internacional Migración e Refuxio en Europa, un foro que se presenta como un espazo aberto de aprendizaxe, reflexión e análise da situación das migracións no vello continente e que pretende ser útil para a articulación de solucións a unha problemática internacional. O vicerreitor de Coordinación do campus de Lugo, Javier Bueno, guiou a sesión de apertura deste congreso, na que tamén interviñeron, ademais da decana da Facultade de Humanidades da USC, María Isabel González Rey; a alcaldesa de Lugo, Lara Méndez; o conselleiro de Politíca Social da Xunta de Galicia, José Manuel Rey Varela, e a deputada provincial delegada da área de Cultura, Artesanía e Deseño, Pilar García Porto. As autoridades políticas e académicas presentes salientaron o carácter de acollida da sociedade galega, así como as distintas iniciativas postas en marcha polas administracións para favorecer a integración en condicións de “normalidade” deste colectivo de persoas en situación vulnerabilidade. O desenvolvemento dun plan de acción global para dar resposta á situación dos refuxiados e a pertinencia do desenvolvemento dunha lei de asilo en España tamén foron outras das ideas lanzadas na apertura deste foro. Programa A catedrática de Traballo Social da Universidade de Castilla La Mancha, María José Aguilar, abriu a quenda de intervencións deste congreso, en cuxo programa tamén figuran como relatores Carlos Uriarte Sánchez, membro do Consello da Presidencia da Unión Paneuropea Internacional; o embaixador de Bosnia e Herzegovina en España, Darko Zelenika; a segunda secretaria de Asuntos Europeos da Embaixada de Hungría en España, Adrienn Nasz, e o refuxiado sirio e alumno da USC Mohamad Kamal Aldalati. Juan Iglesias Martínez, da Cátedra de Refuxiados do Instituto Universitario de Estudos sobre Migracións da Universidade Pontificia de Comillas; Carlos Aparicio de Santiago, do Grupo de Acción Sindical (GAS) que está a traballar con refuxiados en Alemaña, e o director do Secretariado da Comisión Episcopal de Migracións de España, José Luis Pinilla, son outros dos relatores que tamén intervirán neste congreso.