Fondo pesar na Universidade de Santiago polo pasamento do profesor José Luis Veiga García

A Universidade de Santiago está de loito polo pasamento do profesor do Departamento de Enxeñaría Química José Luis Veiga García, un membro da comunidade universitaria querido e recoñecido no eido da docencia e a investigación. O pasamento de Veiga García xerou fondo pesar especialmente no campus de Lugo, onde o finado desenvolveu a súa traxectoria académica e investigadora desde a década dos anos 70. A institución únese así á dor de familiares e amizades nestes duros momentos.

O pontevedrés José Luis Veiga García, de 67 anos de idade, finou na tarde do pasado xoves 26 de setembro na capital luguesa. O profesor Veiga García era un dos docentes máis veteranos do campus de Lugo. Comezou a exercer a súa actividade na xa desaparecida Escola Universitaria de Enxeñeiros Técnicos Agrícolas e logo desenvolveu o seu cometido docente como profesor da titulación de Químicas no vello Colexio Universitario de Lugo.