A Facultade de Farmacia celebra este sábado o acto académico da súa patroa

A Facultade de Farmacia celebra este sábado 15 o acto da súa patroa, a Inmaculada Concepción, que estará presidido ás 12.30 horas polo reitor da USC, Juan Casares Long, e que conta cun extenso programa de actividades. Asisten, entre outras personalidades, o presidente da Real Academia de Farmacia de Galicia, Isaac Arias Santos; a decana da Facultade, Isabel Sández Macho; a subdirectora xeral de Farmacia da Consellaría de Sanidade, Carolina González Criado; e o secretario da Facultade, Perfecto Paseiro Losada, encargado de dar comezo á cerimonia coa lectura da Memoria Académica 2011-12 do centro. A continuación procederase á entrega das medallas conmemorativas dos 25 anos de docencia no centro compostelán a Consuelo Souto Pardo, José Ángel Fontenla Gil, Mª Isabel Basadre Pampín, Begoña Seijo Rey, Dolores Torres López, Teresa Díaz Guede e Marcelina Abad Caeiro. Ademais, entregaráselle a insignia de ouro da Facultade aos docentes xubilados do pasado curso Áurea Pereira Lorenzo e José Mª Calleja Suárez, responsable este último de pronunciar no acto a conferencia ‘A ensinanza e os estudos na Facultade de Farmacia da USC’. O programa continuará coa entrega de diplomas aos doutores e doutoras do curso 2011-2012 e aos titores e titoras de prácticas preprofesionais nos centros dependentes da Consellaría de Sanidade e do SERGAS. Xa para rematar procederase á doazón á Facultade de Farmacia dun retrato de Antonio Casares, o seu primeiro decano, e o académico de número da Academia de Farmacia de Galicia, Francisco Díaz-Fierros Viqueira, pronunciará a conferencia ‘Antonio Casares: Farmacéutico’. O acto clausúrase coas palabras da decana e do reitor da USC.