O III Foro de Emprego da USC chega ao Campus de Lugo

A vicerreitora adxunta de Infraestruturas e Servizos, Marta Miranda Castañón, e o decano da Facultade de Administración e Dirección de Empresas de Lugo, Luís Gago González, inaugurarán este xoves 26, ás 11:00 horas, o III Foro de Emprego da USC, que se desenvolverá na Aula Magna desa facultade do campus lugués. O foro, que comezará ás 10:00 horas, vense de celebrar tamén na Facultade de Ciencias Económicas e Empresariais de Santiago.
O Foro de Emprego, organizado pola Vicerreitoría de Comunidade Universitaria e Compromiso Social, a través dos seus Servizos de apoio ao emprendemento e o emprego (SAEE), diríxese a estudantes de últimos cursos e a recén titulados, co obxectivo de que poidan contactar con responsables de selección de empresas, o que supón unha grande oportunidade de coñecer de primeira man o que as diversas firmas buscan nos seus candidatos.
O encontro inclúe oito conferencias, a cargo de profesionais de diferentes empresas e organismos públicos, como Academia Posta, Kiabi, Lug02, o Concello de Lugo ou o IGAPE, e tamén obradoiros nos que os asistentes poderán afondar nas ferramentas e os métodos para a busca de emprego.
Coa celebración de eventos deste tipo, a USC aposta por seguir traballando no seu compromiso de ofrecer aos universitarios alternativas válidas que faciliten o seu acceso ao mercado laboral nas mellores condicións posibles.