O Espazo de Danza da USC participa no Encontro Universitario Internacional Unidanza, da Universidade Carlos III

O Espazo de Danza da Vicerreitoría de Cultura participará na novena edición do Encontro Universitario de Danza Contemporánea, Unidanza, da Universidade Carlos III de Madrid que se celebrará do 9 ao 14 de abril. Unidanza é un encontro no que participan estudantes de diferentes universidades españolas e estranxeiras. Entre as universidades convitadas atópanse, ademais da USC e a anfitrioa, a Universidade de Estremadura, a Europea de Madrid, a París 13 e a de Nantes de Francia, a universidade lituana de Vilnius, a Federico II de Italia e a universidade de Cundinamarca de Colombia.
Unidanza ofrece durante unha semana un programa de espectáculos onde conviven as actuacións dos grupos universitarios con compañías profesionais como BeC, Losdedae, Teatro Lírico de Muñecas e a Compañía Aitana Cordero, ademais de talleres e actividades para os participantes.
O xoves 12 de abril ás 20:00 horas está prevista a intervención do Espazo de Danza da Vicerreitoría de Cultura da USC, no Auditorio Padre Soler no campus universitario situado en Xetafe. O grupo, que dirixe Juan Carlos Zahera, interpretará a coreografía ‘Cun par de TakóNS!’ peza na que o grupo trata de amosar diferentes estados anímicos das mulleres expresados a través de estados físicos que van desde a pasividade ata o frenesí, pasando polo total descontrol como contedores dunha deconstrución da imaxe feminina.