Tres estudantes da USC acadan dúas medallas de bronce no Campionato de España Universitario de Remo

Os estudantes da USC Rubén Abad Fariña, Antía Domínguez Rodríguez e Laura González García acadaron dúas medallas de bronce na segunda edición do Campionato de España Universitario de Remo que se celebrou o pasado sábado, día 5, no Centro de Alto Rendemento, situado en Sevilla.
Na modalidade individual masculina, Rubén Abad, alumno da Facultade de Física, ocupou o terceiro posto por detrás da Universidade de Córdoba e da Pública de Navarra, que acadaron o primeiro e segundo lugar, respectivamente. No caso da competición feminina por parellas, Antía Domínguez, estudante de Medicina, e Laura González, alumna de Bioloxía, quedaron por detrás da Universidade de Sevilla, que obtivo medalla de ouro, e de Xirona, gañadora da medalla de prata.
Asemade, as deportistas da USC Charo López, Ánxela Segada, Laura González e Antía Domínguez acadaron o cuarto posto na modalidade feminina de catro e os rapaces Borja Estefanell e Francisco López conseguiron ocupar o sexto lugar na categoría de dous masculina.