Aberta a inscrición para as sesións de Conversas do CLM
Inglés, francés e checo son os idiomas que se ofertan no marco das Conversas do Centro de Linguas Modernas (CLM) da USC, sesións de conversación dirixidas por profesorado orientadas á práctica da expresión e a interacción oral, nas que se afianzan estruturas lingüísticas, repásase vocabulario, mellórase a pronuncia e gáñase en fluidez. Os requirimentos para solicitar praza poden consultarse na web do CLM.
Segundo a lingua e o nivel, os encontros poden desenvolverse de xeito presencial nas aulas da USC, cun máximo de ata seis alumnos e alumnas; ou en liña a través de MS Teams, con catro integrantes, alén do profesorado especializado.
As persoas interesadas en formalizar a súa inscrición e que non teñan o nivel asignado polo CLM, terán que facer un test de nivel por internet ou unha titoría de acceso. Deberán enviar un correo electrónico a clm [at] usc.gal (clm[at]usc[dot]gal) e inscribirse no test dende a secretaría virtual da USC.