Obradoiro de nova xestión cultural, en xullo en Filoloxía

Do 10 ao 14 de xullo desenvolverase na Facultade de Filoloxía o curso de verán ‘ Cultura, participación e futuro. Obradoiro de nova xestión cultural’ dirixido por Diego Vázquez Meizoso. O prazo de matrícula remata o 30 de xuño.

O encontro trata de achegar unha perspectiva do traballo en xestión cultural en Galicia e dos perfís necesarios e posibles saídas profesionais neste sector. Á vez, desenvolverá dunha forma teórico-práctica unha metodoloxía de intervención e traballo á hora de afrontar un proxecto cultural e mostrará diversas tipoloxías de espazos e proxectos do noso contexto cultural.

As xornadas estrutúranse en sesións expositivas teóricas e obradoiros de dinámicas grupais sobre moi variadas temáticas. Ademais, contémplanse visitas guiadas polos responsables de 3 equipamentos e proxectos culturais: unha institución pública, un espazo cultural de titularidade privada e un do terceiro sector.