Preto de 5.300 estudantes de 102 centros de ensino medio de toda Galicia inscríbense nos Encontros na Zona USC de Compostela
Os Encontros na Zona USC inician este martes 3, en Compostela, unha nova edición que se estenderá ata o día 6 de febreiro e no que preto de 5.300 estudantes de 102 centros de ensino medio de toda Galicia poderán coñecer de primeira man a oferta docente e de servizos da Universidade de Santiago. A través dun total de 17 itinerarios, o estudantado preuniversitario visitará as aulas, laboratorios e outros espazos dos centros nos que se imparten as titulacións da súa preferencia.
Ademais, no caso do campus lucense, aínda é posible reservar praza a través dun formulario en liña xa que os Encontros na Zona USC do Campus de Lugo desenvolveranse os días 24 e 25 de febreiro. No pasado ano académico, visitaron a sede universitaria luguesa 862 estudantes de 16 centros de ensino medio.