A USC inaugura en Farmacia unha aula que simula unha oficina farmacéutica na que se desenvolverá a docencia práctica
A Facultade Farmacia da USC conta desde este martes 16 cunha aula de simulación dunha oficina farmacéutica, un espazo pioneiro na universidade pública española no que se reproducen as instalacións e os equipamentos máis habituais dunha botica e na que se desenvolverán actividades de docencia práctica.
A sesión de apertura da Aula-USC-Cofaga-Cofano desenvolveuse na Aula Magna da Facultade de Farmacia no marco dun acto presidido polo reitor Juan Viaño, e no que tamén participaron a decana da facultade compostelá, Isabel Sández Macho, así como os presidentes da Cooperativa Farmacéutica Gallega (Cofaga), Miguel Reviejo, e de Farmacéutica del Noroeste, Sociedade Cooperativa Gallega (Cofano), Manuel Muradás. A lección maxistral do acto inaugural, a cargo do presidente da Real Academia Galega de Farmacia e ex presidente do Consello Social da USC, Manuel Puga Pereira, serviu tamén para destacar os importantes beneficios formativos que reportará esta nova aula universitaria, unha instalación froito da colaboración entre USC, Cofaga e Cofano que está chamada a ser un centro de referencia para a formación continua dos/as profesionais farmacéuticos/as.
A Aula-USC-Cofaga-Cofano servirá para explicar aos/ás futuros/as profesionais as particularidades dun sistema, o cooperativo, cuxo funcionamento ten colectado satisfactorios resultados nos últimos 70 anos. A labor deste espazo formativo na Facultade Farmacia da USC evidencia a existencia de vasos comunicantes entre a esfera profesional e o espazo formativo dos estudantes que poderán coñecer a vida diaria e o funcionamento das cooperativas farmacéuticas. A Aula dedicarase ao desenvolvemento de actividades tendentes a mellorar a formación teórica e práctica do alumnado da Facultade de Farmacia da USC, podendo utilizarse, ademais, para a formación práctica dos servizos profesionais desenvolvidos polo/a farmacéutico/a comunitario/a e a xestión das oficinas de farmacia, así como accións de divulgación relacionadas na USC. Para conseguir os seus obxectivos, a Aula-USC-Cofaga-Cofano está totalmente equipada, a fin de representar situacións reais de dispensacións, seguimento farmacoterapéutico e fármaco vixiancia. As instalacións e equipamentos específicos xa instalados, así como outros que foran necesarios para impartir a formación corren a cargo de Cofaga e Cofano.
