Resolución reitoral do 10 de novembro de 2025 pola que se convoca elección de reitora ou reitor da Universidade de Santiago de Compostela

De conformidade cos Estatutos da Universidade de Santiago de Compostela (USC) e co artigo 47 do Regulamento Electoral Xeral (REX),

RESOLVO:

Primeiro. Convocatoria

Convocar eleccións de reitor ou reitora da Universidade de Santiago de Compostela, co calendario de actos e trámites que a continuación se indica. A convocatoria desenvolverase segundo o disposto nos Estatutos, no REX e na normativa e acordos de desenvolvemento.

Segundo. Sectores electorais

Os sectores electorais serán os seguintes:

- Sector I. Profesorado doutor con vinculación permanente.

- Sector II. Restantes categorías de PDI: Profesorado funcionario non doutor; profesorado axudante doutor; profesorado colaborador; profesorado asociado; profesorado substituto; profesorado emérito; profesorado visitante; profesorado distinguido; persoal investigador da USC pertencente a algunha das categorías establecidas na Lei 14/2011, de 1 de xuño, da Ciencia, a Tecnoloxía e a Innovación así como no Acordo sobre clasificación profesional e as condicións retributivas do persoal investigador e do persoal de apoio á investigación da Universidade de Santiago de Compostela, sempre que permitan a colaboración en tarefas docentes; persoal investigador en formación, segundo o establecido nos Estatutos da USC e na Disposición adicional quinta do REX; persoal doutor contratado pola USC consonte a lexislación vixente con cargo a programas competitivos de incorporación ás universidades de investigadores e/ou docentes, sempre que o contrato permita docencia; aqueloutras persoas contratadas pola USC mediante concurso público que realicen labores docentes ou investigadoras e que cumpran os requisitos, entre outros os de permanencia e dedicación que se establezan no REX.

No caso de profesorado e persoal investigador con vinculación temporal coa USC, será requisito para considerarse elector que o seu vínculo coa Universidade teña unha antigüidade igual ou superior a un ano dentro dos últimos dezaoito meses e unha dedicación polo menos a media xornada.

- Sector III. Estudantado da USC matriculado en titulacións oficiais: grao, máster, doutoramento.

- Sector IV. Persoal técnico, de xestión e de administración e servizos contratado con cargo ao capítulo I das normas orzamentarias; persoal directivo profesional e persoal eventual, así como persoal das categorías de persoal investigador sen colaboración en tarefas docentes e das de persoal de apoio á investigación recollidas no Acordo sobre clasificación profesional e as condicións retributivas do persoal investigador e do persoal de apoio á investigación da Universidade de Santiago de Compostela.

No caso de persoal técnico, de xestión e de administración e servizos e de persoal investigador sen colaboración en tarefas docentes e persoal de apoio á investigación con vinculación temporal será requisito para consideralo como elector que o seu vínculo coa Universidade teña unha antigüidade igual ou superior a un ano dentro dos últimos dezaoito meses e unha dedicación de polo menos media xornada.

Terceiro. Calendario electoral

Esta elección desenvolverase conforme ao seguinte calendario:

Publicación do censo provisional	10 novembro
Reclamacións ante a Secretaría Xeral contra o censo provisional	10 - 14 novembro
Resolución da Secretaría Xeral sobre rectificación do censo	18 novembro
Recursos ante a Comisión Electoral Central (CEC) contra o censo	18 - 21 novembro
Publicación do censo electoral definitivo	25 novembro
Presentación de candidaturas	26 novembro - 5 decembro
Proclamación provisional de candidatas/os	11 decembro
Recursos ante a CEC contra a proclamación provisional de candidatas/os	12-16 decembro
Proclamación definitiva de candidatas/os	19 decembro
Sorteo de membros das mesas electorais electrónicas	19 decembro
Campaña electoral	27 de xaneiro - 10 de febreiro
Xornada de reflexión	11 de febreiro
Votación	12 de febreiro (desde as 9:00h ata as 18:00h)
Proclamación provisional da/do candidata/o electa/o (ou candidatas/os que concorrerán á segunda volta)	13 de febreiro
Recursos ante a CEC contra a proclamación provisional da candidata/o electa/o (ou candidatas/os que concorrerán á segunda volta)	18 febreiro - 24 febreiro
Proclamación definitiva da reitora ou reitor electa/o (agás no caso de que sexa necesaria segunda volta)	26 febreiro
Prolongación da Campaña electoral da segunda volta	27 febreiro - 9 de marzo
Xornada de reflexión	10 marzo
Votación da segunda volta (de ser o caso)	11 marzo
Proclamación provisional da reitora ou reitor electa/o	12 marzo
Recursos ante a CEC contra a proclamación provisional	13 - 20 marzo
Proclamación definitiva da reitora ou reitor electa/o	23 de marzo

O procedemento electoral será de votación electrónica, conforme ao establecido no anexo I.

A votación efectuarase o día 12 de febreiro, en horario ininterrompido desde as 09:00 ata as 18:00 horas.

Cuarto. Electores/as

Serán electores/as en cada sector as persoas censadas nel de conformidade coa normativa electoral.

Quinto. Candidaturas

De conformidade co establecido no artigo 46.1 do REX, modificado por acordo do Consello de Goberno de 26 de setembro de 2025, as candidatas ou candidatos a reitora ou reitor deberán ser persoal docente e investigador permanente doutor a tempo completo, prestar servizos na USC e estar en posesión, como mínimo, dos requisitos establecidos no apartado 3 da Disposición transitoria primeira da Lei Orgánica 2/2023, do Sistema Universitario: tres sexenios de investigación, tres quinquenios docentes e catro anos de experiencia de xestión universitaria nalgún cargo unipersoal.

Sexto. Presentación de candidaturas

A presentación das candidaturas e dos escritos relacionados con esta convocatoria deberá facerse a través da aplicación electoral: https://aplicacions.usc.es/axe/publica, antes das 14:00 horas do día no que remate o prazo de presentación. As persoas que presenten a súa candidatura deberán alegar os méritos a considerar para a verificación do cumprimento dos requisitos indicados no apartado anterior, utilizando para tal fin o campo do formulario “Méritos alegados”.

Os documentos acreditativos dos méritos alegados deberán estar incorporados no expediente persoal da candidata ou candidato antes da finalización do prazo de presentación de candidaturas, podendo solicitar vista do seu expediente con carácter previo e incorporar, de ser necesario, documentación adicional.

Sétimo. Acreditación da identidade dixital

Para acceder á aplicación electoral os/as electores/as terán que identificarse mediante as claves de acceso corporativas da USC. O estudantado tamén poderá acceder á aplicación desde a Secretaría Virtual.

Oitavo.

Este proceso electoral rexerase polo establecido nesta convocatoria, polo REX en todo o que sexa de aplicación e, subsidiariamente, pola regulación electoral xeral e de administración electrónica que sexa de aplicación.

Noveno.

Esta convocatoria terá efectos desde o día da súa publicación no taboleiro electrónico da USC.

Santiago de Compostela, na data da sinatura electrónica

O reitor

Antonio López Díaz

Publicado no taboleiro electrónico da USC con data do 10/11/2025

https://sede.usc.es/sede/publica/taboleiro/anuncio/136137/carga.htm

D536-3C17-4C2E-BEC7

ANEXO I

PROCEDEMENTO ELECTORAL

Sistema electoral electrónico

1. O sistema electoral consistirá na emisión de votos desde un dispositivo conectado a Internet ata unha urna dixital remota situada nun recinto protexido e baixo a custodia da Comisión Electoral Central da USC.

A USC garantirá que a infraestrutura tecnolóxica que dá soporte ao sistema electoral contemple as medidas de seguridade que garantan o correcto funcionamento durante o período no que se exerce o dereito ao voto, o secreto e a privacidade do votante, a integridade do voto e un escrutinio disociado.

2. O sistema electoral electrónico será o seguinte:

a) Reunirase a Mesa electoral electrónica que estará composta por tres membros, nomeados pola Comisión Electoral Central, logo dun sorteo (presidente e vogais). Na reunión tamén poderán estar presentes as persoas designadas interventoras, e o equipo de apoio responsable do mantemento do voto electrónico. Reuniranse a primeira vez cunha antelación mínima dunha hora ao inicio da votación no lugar que determine a Comisión Electoral Central.

Para a válida constitución da Mesa electoral electrónica será necesaria a asistencia dos tres membros.

b) O presidente da Mesa Electoral Electrónica deberá iniciar o sistema de elección o día e á hora indicada na convocatoria de eleccións. Ningún elector nin electora poderá acceder á dirección electrónica que dá acceso á páxina web electoral fóra do horario establecido para a votación.

3. A votación realizarase unha soa vez, sendo este o voto válido emitido.

4. O sistema de votación contemplará a posibilidade de emitir votos a persoas e votos en branco. Non existirán votos nulos.

Sistema de votación

1. O voto electrónico emitirase desde calquera dispositivo conectado a Internet.

2. Os electores e as electoras conectaranse a través da súa Secretaría Virtual, ou ben desde a web electoral, na que se habilitará unha ligazón á aplicación de voto. No caso de non se poder conectar porano en coñecemento da Comisión Electoral Central ou da Secretaría Xeral a efectos de que se tomen as medidas oportunas para resolver a incidencia. A comunicación farase a través da conta de correo evoto@usc.es.

3. Os electores e electoras identificaranse coas claves de acceso corporativas da USC.

4. Na pantalla de votación constarán relacionadas as candidaturas proclamadas, así como a opción de voto en branco. Unha vez realizada a opción de voto, terase que premer “Emitir o voto”. A continuación mostrarase a candidatura ou as candidaturas escollida/s e solicitarase a confirmación da opción elixida. En caso de non querer confirmala, o elector ou electora terá a posibilidade de realizar unha nova selección.

5. Unha vez confirmada a opción de voto, codificarase o voto coa clave de codificación/cifra. Seguidamente, tense que asinar o voto do elector ou electora e tense que remitir á urna dixital remota.

6. Unha vez finalizado o procesamento do voto, darase opción a imprimir ou gardar un recibo cun código de control, que permitirá comprobar ao elector ou electora que o seu voto foi emitido e utilizado no escrutinio.

7. As votacións realizadas por este sistema substitúen ás votacións en urna física e os resultados serán vinculantes, sen precisar sistemas alternativos para a votación presencial.

Administración Electoral

A Comisión Electoral Central será a responsable do procedemento electoral e da custodia dos votos emitidos. Entre as súas funcións está:

a) Resolver as incidencias do procedemento e difundir os acordos adoptados para resolución das mesmas

b) Publicar e difundir os resultados do escrutinio

c) Resolver as reclamacións e recursos

Pola súa banda, a Mesa Electoral Electrónica encargarase da apertura da urna electrónica en presenza das persoas interventoras, responsabilizarase da custodia da clave descifradora para permitir o escrutinio e realizará este.

Poderá existir unha Mesa de administración nomeada pola Comisión Electoral Central para resolver as incidencias técnicas ou administrativas que se poidan producir durante a votación electrónica na que colaborará un equipo de apoio técnico que asesorará en aspectos tecnolóxicos.

Se por causas de forza maior ou por calquera incidencia técnica non fose posible iniciar os actos de votación ou de escrutinio, ou se tivesen que interromper estes unha vez iniciados, a Comisión Electoral, en función da duración e natureza da incidencia ou doutras circunstancias, poderá adoptar calquera das solucións seguintes:

a) Prorrogar a duración do período da votación electrónica polo tempo que estime conveniente

b) Suspender ou aprazar a votación ou o escrutinio

c) Acordar que a votación se leve a cabo polo sistema tradicional, coa indicación dos prazos pertinentes, e resolver as restantes cuestións que estime oportunas

No caso de que se opte polas solucións b) ou c), se algún elector ou electora tivese votado a Comisión Electoral Central poderá acordar a destrución dos votos e das claves criptográficas. Neste caso, o electorado afectado volverá exercer o seu dereito de sufraxio co sistema e data que se acorde.

Se a anomalía comportase a substitución de calquera dos computadores que conforman o sistema informático electoral, a Comisión Electoral Central poderá ordenar a súa reposición ou a destrución dos votos e das claves criptográficas.

Se o que se tivese que substituír fose a urna electrónica, a Comisión Electoral Central decidirá cando proceder á destrución dos votos e das claves criptográficas.

A presidencia da Comisión Electoral Central comunicará as medidas acordadas ao órgano competente a fin de que informe ao electorado afectado e lles dea publicidade na páxina web electoral.

As incidencias xurdidas ao longo do procedemento e as medidas de resolución adoptadas faranse constar en acta.

A Secretaría Xeral da Universidade coidará do correcto desenvolvemento da convocatoria electoral e asegurará a disposición de medios para a votación.

Escrutinio do voto

1. Acabadas as votacións electrónicas, os membros da Comisión Electoral Central reuniranse no lugar que a presidencia determine.

2. Os membros da Mesa Electoral Electrónica, con presenza das persoas interventoras e, no seu caso, das asesoras técnicas do voto electrónico, procederán a reconstruír a clave descifradora, descodificar os votos e iniciar o escrutinio. En todo caso, será necesaria para a reconstrución da clave descifradora a presenza dos tres membros da Mesa Electoral Electrónica. Se algún deles extraviase a súa fracción de clave terá que xustificalo e comunicalo á presidencia, debéndose facer constar esta incidencia na acta da sesión.

3. Cada un dos membros da Mesa Electoral Electrónica achegará a fracción da clave descifradora que lle corresponde e a descodificará co seu certificado dixital. Así reconstruirase a clave mencionada, que permitirá interpretar o contido dos votos electrónicos. A continuación iniciarase o escrutinio electrónico.

4. O proceso de descifrado dos votos ten que garantir que se impida coñecer a identidade dos votantes.

5. A presidencia da Comisión Electoral Central publicará o resultado provisorio das eleccións conforme aos calendarios e procedementos establecidos nesta convocatoria.

6. Agás no caso de impugnación, unha vez transcorrido o prazo de catro meses desde a proclamación dos e das representantes electos, a presidencia da Comisión Electoral, en presenza, se é o caso, do asesoramento técnico pertinente, procederá á destrución tanto da clave descifradora que permite abrir a urna electoral como dos votos electrónicos depositados na urna electrónica remota.

Non se poderán destruír os votos electrónicos que fosen obxecto de impugnación, reclamación ou dúbida, nin polo tanto a clave descifradora. Esta e os votos electrónicos custodiaranse e conservaranse ata que finalice o procedemento correspondente.

Ata a destrución da clave descifradora e dos votos electrónicos depositados na urna electrónica, a Mesa Electoral Electrónica custodiará a clave descifradora e os votos electrónicos depositados na urna electrónica, de acordo co seguinte procedemento:

• Cada membro da Mesa Electoral Electrónica introducirá nun sobre a memoria USB coa parte da clave criptográfica mencionada. Todos os sobres terán que estar debidamente pechados e asinados de forma manuscrita.

• Gardarase nun soporte informático a lista de votos electrónicos cifrados.

A persoa titular da Secretaría Xeral conservará toda a información xerada durante o proceso electoral para garantir que os votos emitidos non sexan alterados e gardaraos na caixa forte de seguridade da Universidade, baixo a súa custodia.