Galego

O Centro de Linguas Modernas da USC ofrece formación regular en lingua galega para as persoas que veñen de fóra de Galicia e que teñan máis de 18 anos: os cursos de lingua galega para non galegofalantes, adaptados aos niveis A1, A2, B1 e B2 do Marco Europeo Común de Referencia para as Linguas (MECRL).

Teñen unha duración de 50 horas (40 horas lectivas presenciais e 10 de traballo autónomo tutelado). Os cursos poden ter un formato semestral (setembro-decembro, febreiro-maio) ou intensivo de 2 meses.

Os grupos teñen un máximo de 15 alumnos.

Para obter o certificado do curso e créditos ECTS cómpre superar a avaliación e asistir a un mínimo do 80% das horas de clase.

O alumnado dos países que non teñen como lingua oficial o castelán ou portugués deben acreditar o coñecemento da lingua española ou galega mediante un título de nivel B1 ou B2, segundo o caso, do Marco Común Europeo de Referencia para as Linguas, para poderen cursar na USC estudos de grao ou de mestrado.

A acreditación do coñecemento da lingua galega nos niveis B1 e B2 ten, logo, a mesma validez cá de lingua castelá para o acceso a graos e mestrados, no caso de estudantes procedentes de fóra de Galicia.

As persoas aspirantes a unha praza de profesorado permanente da USC teñen o requisito de acreditar o coñecemento da lingua galega, co nivel Celga 3 (equivalente a B2). No caso de non posuír este título, ten un prazo de dous anos para conseguilo dende a súa contratación ou nomeamento.

Para acreditares os coñecementos de galego na USC, a universidade ofrece varias vías:

• Achegar un título ou diploma que estea recoñecido pola USC.
• Aprobar un curso de galego no CLM da USC que complete un nivel do MECRL.
• Presentarte ás probas de competencia lingüística de galego do CLM antes de comezar os estudos. De non superar esta proba de competencia lingüística, existe a obriga de seguir un curso do CLM e volverse presentar á seguinte data de exame.

Nos estudos de grao da USC poden recoñecerse créditos por competencias transversais, por exemplo, por cursos de linguas realizados no CLM, ata un máximo de 6 ECTS.

Para os estudantes procedentes doutra comunidade autónoma que non completaron os seus estudos preuniversitarios en Galicia e para alumnado estranxeiro, recoñécense polos cursos de galego do CLM:

• A2: 3 ECTS
• B1: 4 ECTS
• B2: 5 ECTS