As clases que o profesorado da USC imparta en galego desde o curso 2024-2025 vanse recoñecer na programación académica con 0,2 horas docentes equivalentes -HDE- por cada hora lectiva.
Así se recolle (Anexo I, apartado 1.ñ) no Regulamento de planificación académica que a Universidade aprobou a finais de 2024, e neste espazo imos contar que implica ese recoñecemento para o profesorado que teña dereito a el, e como pode facelo efectivo.
E, por se isto pode ser o pequeno empurrón que outras e outros docentes estaban agardando para incorporar o galego á súa docencia, ofrecemos tamén consellos e servizos para acompañar nese cambio.
Son unha forma que a Universidade estableceu para recoñecer a dedicación a determinadas actividades docentes, investigadoras ou de xestión por parte do PDI a tempo completo e polo profesorado substituto a tempo parcial.
As HDE permiten reducir a cantidade de horas lectivas que un/unha docente debe impartir sempre que a área de coñecemento poida asumir a docencia que a Universidade lle asignou na planificación docente anual.
Cada departamento ou área de coñecemento establece a forma en que estas HDE se recoñecen en función da súa encarga docente e da dispoñibilidade docente do seu profesorado.
No caso de que as reducións non se poidan aplicar integramente, farase unha minoración proporcional a todo o PDI da área que acredite HDE.
Para ter dereito a horas docentes equivalentes por docencia en galego no curso vindeiro, unha profesora ou profesor debe:
- Impartir en galego toda a docencia que lle corresponde (expositiva, interactiva, titoría...) nun grupo de docencia dunha materia.
É dicir, non acadaría HDE se imparte a docencia expositiva en galego, pero a interactiva en castelán. Pero si as acadaría se imparte as súas horas docentes en galego, aínda que outro docente que comparta con el a súa materia o faga en castelán.
- Ter unha dedicación a tempo completo ou ser profesorado substituto a tempo parcial.
- Poder acreditar que esa docencia se impartiu en galego con datos do Plan de Organización Docente (POD) do curso actual.
Os departamentos son os encargados de incorporar de oficio as HDE recoñecidas por docencia en galego.
Nun período establecido no Calendario de planificación académica anual (para o curso 2025/2026, entre o 10 de marzo e o 1 de abril) "os departamentos procederán á revisión das fichas do seu profesorado e, de ser o caso, á introdución de datos".
Por iso, non debería ser preciso realizar ningún trámite para que os méritos docentes que permiten o recoñecemento de HDE consten na ficha de cada docente.
Pero ao tratarse dun recoñecemento novo parece aconsellable que cada docente revise as horas que se lle recoñecen para asegurarse de que a súa docencia en galego se ten en conta no cómputo.