Unha alumna do máster universitario en Dirección de Empresas da USC gaña o I Premio AECOC Mundo Académico

A alumna do máster universitario en Dirección de Empresas da Facultade de Ciencias Económicas e Empresariais da USC Vanesa Eirís é unha das galardoadas nos I Premios AECOC Mundo-Académico, destinados a distinguir os mellores traballos de fin de grao e posgrao nas categorías de Comercial-Trade Marketing, Supply Chain e Tecnoloxía Aplicada. En total, concedéronse sete premios a alumnado das universidades de Valencia, Zaragoza, Autónoma de Madrid, Politécnica de Madrid e de Santiago de Compostela. Esta é unha convocatoria da Asociación de Empresas de Gran Consumo AECOC. O primeiro premio da categoría Comercial-Trade Marketing, dotado con 3.000 euros e entregado polo presidente de AECOC Javier Campo, recaeu en Vanesa Eirís polo seu traballo de fin de máster ‘A adopción do comercio electrónico por parte do consumidor: un estudo empírico”, realizado baixo a dirección de Emilio Ruzo Sanmartín, profesor da Área de Comercialización e Investigación de Mercados da USC. En opinión do xurado, este traballo analiza un tema de interese para as empresas do gran consumo, combina unha boa análise de literatura previo cun estudo de campo e trata de achegar conclusións e aprendizaxes neste ámbito. Integraron o xurado o presidente e director xeral de AECOC, Javier Campo e José María Bonmatí; o secretario xeral de Universidades, Fernando Morán; o conselleiro de Campofrío Juan José Guibelalde; o ex presidente do Grupo Eroski, Constan Dacosta; o ex presidente de Nestlé, José Arcas; e o ex presidente de Unilever, José María Vilas. En total valoraron 40 candidaturas procedentes de 18 universidades de toda España. Os primeiros premios das categorías Supply Chain e Tecnoloxía recaeron sobre estudantes da Universidade de Zaragoza e da Universidade Politécnica de Madrid, respectivamente. Proxecto Universidad-Mundo Académico A convocatoria do I Premio AECOC Mundo Académico enmárcase no proxecto Universidade-Empresa recentemente posto en marcha pola Asociación de Empresas do Gran Consumo, que reúne a máis de 25.000 compañías do país. Esta iniciativa, que trata de estreitar lazos entre o colectivo académico e o empresarial, integra xa a 30 universidades de toda España, entre as que se atopa a Universidade de Santiago.

A entrega dos premios acaba de celebrarse en Madrid, xunto coa dos II Premios de Periodismo AECOC pola Competitividade Empresarial. No acto déronse cita 150 máximos directivos de compañías como Leche Pascual, Danone, Coca-Cola, Mahou San Miguel, Eroski, Carrefour, Pepsico, Campofrio, Siro, Toys’R’Us o Nutrexpa.

Os premiados nas distintas categorías proceden das universidades de Valencia, Zaragoza, Autónoma de Madrid, Politécnica de Madrid e de Santiago de Compostela