O Servizo de Deportes do Campus de Lugo presenta a súa oferta para os meses de xuño e xullo
O Servizo de Deportes da USC no Campus de Lugo presentou a nova oferta deste departamento para os meses de xuño e xullo, unha vez rematadas as actividades dos dous cuadrimestres do curso 2011-12. O acto de presentación contou coa presenza do vicerreitor de Coordinación e Planificación do Campus de Lugo, Pedro García Herradón e do coordinador do servizo, Jesús Castro López. A oferta deportiva do campus lucense para os meses de xuño e xullo recupera as actividades que máis éxito tiveron durante o curso, algunhas delas ofertadas por primeira vez. Entre elas, ximnasia de mantemento, mantemento+aeróbic+steps, pilates, danza oriental (todas elas na Aula de Deporte e Cultura da Facultade de Veterinaria), ioga (no ximnasio da piscina das Pedreiras), acondicionamento físico ou squash, estas dúas últimas no pazo de deportes. O prazo de inscrición está xa aberto, e pode realizarse desde a páxina web do Servizo de Deportes da USC ou na Oficina de Deportes da Biblioteca Intercentros do Campus. O calendario de actividades iníciase o luns 4 de xuño e remata o xoves 12 de xullo, sempre en horario de tarde. Todas elas van dirixidas ao público en xeral e teñen un prezo que vai desde os 22 aos 42 euros (segundo a disciplina elixida) para as seis semanas de sesións. Homenaxe aos medallistas da USC A presentación da oferta de actividades do Servizo de Deportes do Campus de Lugo para os meses de xuño e xullo serviu tamén para o recoñecemento do labor de dous dos deportistas que acadaron senllas medallas no Campionato de España Universitario de Atletismo celebrado en Salamanca entre o 4 e o 6 de maio, Manuel Hurtado e Paula Ferreiros. Manuel Hurtado Sanjurjo, estudante na Facultade de Formación do Profesorado, acadou a medalla de ouro na proba de 10.000 metros e, por tanto, o título de campión de España Universitario. Este mesmo atleta alzouse co triunfo na media maratón da Coruña, disputada o pasado domingo 27, cun tempo de 1:06:46. Hurtado xa representara a USC anteriormente en diversos campionatos de campo a través. Paula Ferreiros Fernández, alumna do Grao de Enxeñería Civil na Escola Politécnica Superior, acadou a terceira posición no Campionato de España de Salamanca na disciplina de salto de altura. Esta atleta é nova na USC, polo que se espera que siga deparando novos éxitos deportivos á institución ao longo da súa traxectoria universitaria.