Un equipo interdisciplinar da USC analiza os resultados do Estudo Europeo de Competencia Lingüística encargado pola UE
Un equipo da Universidade de Santiago dirixido polo catedrático de Didáctica das Linguas Estranxeiras da Facultade de Ciencias da Educación e director do Observatorio Atrium Linguarum, José Manuel Vez, será o encargado de analizar unha parte dos resultados do Estudo Europeo de Competencia Lingüística promovido pola Unión Europea. O traballo pretende proporcionar aos Estados membros información comparable sobre as competencias en linguas estranxeiras do alumnado europeo ao finalizar a Educación Secundaria Obrigatoria así como coñecer boas prácticas que permitan mellorar a súa aprendizaxe. Unha vez finalizado o estudo, débense agora analizar os resultados globais e profundar sobre a medida na que certos aspectos particulares teñen influencia nos niveis de competencia alcanzados polos estudantes nos distintos países. Neste sentido, o Ministerio de Educación, Cultura e Deporte, a través do Instituto Nacional de Avaliación Educativa, convidou a catro equipos de investigación –u n deles o da USC- a participar na realización do informe español que se presentará en Bruxelas, xunto os dos demais países participantes, o vindeiro 20 de xuño. Concretamente, o equipo da USC está investigando sobre o papel que xoga a dimensión ambiental de contacto e uso do idioma en contextos non formais no desempeño da comprensión oral. Forman parte deste equipo a profesora Esther Martínez Piñeiro, do Departamento de MIDE na Facultade de Ciencias da Educación, e os profesores Jesús Varela Mallou e Antonio Rial Boubeta, da Unidade de Psicoloxía do Consumidor e Usuario da Facultade de Psicoloxía. Os outros tres equipos invitados a colaborar no Informe oficial español están dirixidos polo profesor José Luís Gaviria Soto da Universidade Complutense, a profesora Sara de la Rica da Universidade do País Vasco e a profesora Brindusa Anghel da Fundación FEDEA. O Estudo Europeo
A proba principal do estudo en España realizouse en marzo do pasado ano en 359 centros avaliándose a comprensión lectora, a oral e a expresión escrita. As escalas de medición de nivel de coñecemento de linguas correspóndense cos primeiros catro niveis (A1, A2, B1 y B2) do Marco Común europeo (CEFR).