O físico matemático inglés Roger Penrose, en Compostela para recoller o Premio Fonseca

O físico matemático Roger Penrose (Inglaterra, 1931) visita Compostela esta semana para recoller o mércores o IV Premio Fonseca que concede o Programa ConCiencia da Universidade de Santiago de Compostela (USC) e o Consorcio de Santiago. Penrose comparecerá diante dos medios de comunicación este martes 22 nunha rolda de prensa ás 11.00 horas na Sala de Prensa do Colexio de Fonseca (Reitoría. Santiago). O programa de Penrose continúa o martes pola tarde cunha recepción co reitor e unha xuntanza con estudantes na Facultade de Matemáticas. Na mañá do mércores reunirase con investigadores da USC na Facultade de Física e xa pola tarde, ás 20.00 horas, recollerá o IV Premio Fonseca nunha cerimonia oficial no Auditorio de Novagalicia Banco (Rúa do Preguntoiro, 23. Santiago) na que pronunciará a conferencia ‘Mirando a través do Big Bang­ cara a ­outro mundo’. Roger Penrose En 1988 o prolífico Roger Penrose compartiu con Stephen Hawking o Premio Wolf en Física, considerado a antesala dos Nobel. Precisamente en 1965 en Cambridge probou con Hawking, con quen ten varias obras publicadas, que as singularidades poden formarse a partir do colapso de inmensas estrelas moribundas.