A Deputación de Lugo subvenciona o POP en Prevención de Riscos que se imparte en Ciencias
A Deputación Provincial de Lugo financiará unha parte do Programa Oficial de Posgrao en Prevención de Riscos Laborais e Saúde Medioambiental, que se celebra dende o mes o outubro na Facultade de Ciencias do Campus Lugués. Así o acordaron este luns 28 o reitor da Universidade de Santiago de Compostela, Senén Barro, e o presidente da Deputación Provincial, José Ramón Gómez Besteiro, coa sinatura dun convenio entre as dúas entidades na Facultade de Humanidades.
Mediante este acordo, a Deputación Provincial financiará esta actividade formativa con 20.000 euros anuais nas cinco edicións previstas inicialmente no convenio (100.000 euros en total), que terá vixencia ata o ano 2012. Expón tamén neste acordo o interese da entidade en fomentar a formación de especialistas nesta materia.
Estes estudos están dirixidos a titulados universitarios e ten por obxectivo dotar ao alumno dun coñecemento teórico e práctico da Prevención de Riscos Laborais que permita a homologación para o exercicio profesional de Técnico Superior nas tres especialidades contempladas na lexislación: Seguridade no Traballo, Hixiene Industrial e Ergonomía e Psicosocioloxía Aplicada. Os seus contidos facilitarán un amplo coñecemento da aplicación da normativa legal ao respecto cumprindo os criterios da Comisión Nacional de Seguridade e Saúde no Traballo para ser técnico.
O máster tamén pretende promover o coñecemento da Toxicoloxía Laboral e a prevención de enfermidades profesionais asociadas á exposición a axentes tóxicos no medio laboral e tomar conciencia sobre os problemas medioambientais e os seus efectos sobre os ecosistemas e a poboación.
O curso impartirase de forma mixta, con clases presenciais e módulos a desenvolver de xeito virtual, cun total de 90 créditos de formación teórica e práctica nos que os alumnos estudarán aspectos como lexislación, seguridade, hixiene, ergonomía e medicina de traballo, entre outros. Será un total de ano e medio de estudos no que se inclúen prácticas en empresas.
A primeira edición do máster deu comezo no mes de outubro e nela participan un total de 43 estudantes. Este POP xurdiu despois da celebración neste mesmo centro de tres edicións do Máster en Prevención de Riscos.