O profesor Manuel Ladra explicará o luns tres dos problemas máis antigos en matemáticas

Tres dos problemas máis antigos en matemáticas, cada un con máis de 2.000 anos de antigüidade, serán explicados este luns, día 12, polo profesor Manuel Ladra González, do Departamento de Álxebra da USC. A conferencia, que terá lugar ás 17:00 horas na Aula Magna da Facultade, enmárcase no ciclo ‘Unha andaina pola Matemática’.
Os orixes dos problemas a tratar na charla remóntanse a arredor dos anos 400 a.C. na civilización grega. O primeiro, coñecido como a duplicación do cubo (ou problema Deliano), consiste en construír un cubo que teña o dobre do volume dun cubo dado. O segundo problema, que se fixo popular polas mesmas datas, é o da trisección do ángulo que consiste en dividir un ángulo calquera en tres partes iguais. Por último, aínda que foi o primeiro en aparecer, o terceiro problema clásico grego foi o da cuadratura do círculo, que consiste en construír un cadrado da mesma área que a dun círculo dado. O problema radica en relacionar o radio coa área do círculo ou a lonxitude da circunferencia.
Nos tres casos, as construcións teñen que facerse usando só regra e compás, algo que con estes medios os gregos non conseguiron resolver. Algúns obtiveron solucións xeométricas e mecánicas destes problemas, pero non con regra e compás, que era a metodoloxía esixida.
Ao longo dos anos estes problemas foron abordados por moitos dos mellores matemáticos, sendo finalmente resoltos no século XIX. En 1837, Wantzel resolveu os problemas da duplicación do cubo e da trisección do ángulo, e en 1882 Lindemann resolveu o da cuadratura do círculo.