O XIV Curso sobre Progresos en Endocrinoloxía Pediátrica reunirá na Facultade de Medicina a 200 profesionais da especialidade

A Facultade de Medicina converterase o vindeiro mes de abril en punto de encontro para os 200 pediatras que está previsto que asistan ao XIV Curso sobre Progresos en Endocrinoloxía Pediátrica. O programa deste encontro celebrarase integramente o día 13 de abril organizado pola Unidade de Endocrinoloxía Pediátrica, Crecemento e Adolescencia, que dirixe o catedrático e director do Departamento de Pediatría da USC Manuel Pombo Arias.
O curso desenvolverase arredor de catro mesas redondas nas que se analizarán diferentes temas relacionados coa diagnose precoz do hipotiroidismo conxénito e o seu seguimento, os trastornos derivados cun desenvolvemento puberal adiantado ou retrasado, a valoración da talla baixa e o retraso de crecemento intrauterino.
A conferencia de clausura deste encontro correrá a cargo do profesor Raúl Calzada, xefe do Servizo de Endocrinoloxía do Instituto Nacional de Pediatría de México e presidente da Sociedade Mexicana de Endocrinoloxía Pediátrica, que falará sobre “Diabetes mellitus: o seu manexo durante a puberdade”.