Santiago, Vigo e A Coruña organizan os Campionatos Deportivos Galegos Universitarios

As Universidades de Santiago de Compostela, Vigo e a Coruña celebrarán nos seus diferentes campus os Campionatos Galegos Universitarios, que este ano por vez primeira contan co cofinanciamento da Dirección Xeral de Deportes da Xunta de Galicia.
Os oito certames foron presentados en roda de prensa este martes no Colexio de Fonseca. No acto participaron o vicerreitor de Cultura da USC, Elias J. Torres, e o director da Área de Deportes, Mariano García-Verdugo; o vicerreitor de Extensión Universitaria e Comunicación da Universidade da Coruña, Luís Caparrós, e o seu xefe da Área de Deportes, Manuel Moya; e a vicerreitora de Extensión Cultural e Estudantes da Universidade de Vigo, Mª Carmen Cabeza, e o técnico de Deportes Javier Rial.
O apoio da Xunta de Galicia a través da Dirección Xeral de Deportes, como puxo de manifesto o vicerreitor Elías Torres, “incrementarase” nos próximos anos, “agardando por fin poder realizar unha convocatoria conxunta” entre a UVI, UDC, USC e a Dirección Xeral de Deporte, recoñecendo así esta última o deporte universitario dentro do seu ámbito de competencias.
O fomento e apoio ao deporte galego, especialmente nunha idade propicia, e a promoción da práctica deportiva son os criterios para a selección dos deportes para o campionato, segundo explicou Luís Caparrós. Deste xeito, tense en conta tanto a demanda dos universitarios como a participación no ano anterior e a convocatoria dos de España Universitarios por parte do Consejo Superior de Deportes.
Ademais, e por vez primeira, este campionato cobra valor institucional, recoñecendo o esforzo das diversas áreas e servizos de Deportes e dos seus responsables das tres universidades. Un valor institucional que se reflicte, asegurou Carmen Cabeza, “na presenza dos tres vicerreitores con competencias no deporte universitario nesta presentación pública”.
Campionato de Deportes Colectivo na USCO inmediato campionato a celebrarse corresponde aos deportes colectivos que terá lugar este mércores, día 7, a partir das 10:00 horas en distintas instalacións de Compostela, organizado pola Universidade de Santiago, e no que participan 150 deportistas. A competición de fútbol masculino e fútbol 7 feminino desenvolverase no Campo Municipal de fútbol de Santa Isabel; o de baloncesto no Pavillón polideportivo Municipal Lorenzo de la Torre; o de balonmán no Pavillón polideportivo municipal do Restollal; e, por último, o de voleibol no Pavillón Polideportivo da USC. O remate do campionato e a entrega de premios terá lugar neste último pavillón a partir das 19:30 horas.
Vindeiros CampionatosCada ano convócase unha xuntanza entre os compoñentes dos tres servizos para avaliar os resultados do ano anterior e programar os campionatos que se organizarán seguindo diferentes criterios. Así, este ano a Universidade de Santiago de Compostela é a encargada de organizar, ademais do de deportes colectivos deste mércores, o de xadrez os días 23 e 23 deste mes e o de raid de aventura (carreira, bicicleta e piragüismo) que se desenvolverá o 2 de xuño no Concello de Ames, os dous por vez primeira como campionatos galegos.
Pola súa banda, a Universidade da Coruña organiza o galego de natación, os días 20 e 21 de marzo no Campus de Ferrol; o de voleipraia o 12 de abril na Praia de Oza e o de deportes colectivos para PDI e PAS na cidade herculina. A de Vigo será a Universidade que organice o campionato galego de orientación o 24 de marzo e o de atletismo en ruta ’10 quilómetros. Cidade universitaria’ o 1 de abril.
Dos Campionatos Galegos Universitarios xa se celebrou, o 4 de febreiro en Ourense, o de campo a través, facéndose coincidir co galego federado de campo a través curto.
HistoriaOs galegos universitarios datan do ano 1999 e dende entón viñéronse celebrando cunha media que oscila arredor de 600 participantes, dependendo das modalidades programadas cada ano. Algúns destes son utilizados, segundo os regulamentos internos de cada universidade, para formar unha parte das seleccións representativas que participan nos campionatos de España.