Un curso do Centro Nacional de Xenotipado estuda o compoñente xenético de enfermidades complexas

‘O compoñente xenético de enfermidades complexas: SNPs e estudos de asociación’ é o tema central do curso que o Centro Nacional de Xenotipado (CeGen) e a USC van celebrar os días 31 de maio e 1 de xuño na Facultade de Medicina e no Complexo Hospitalario Universitario de Santiago.
O obxectivo deste curso é proporcionar aos investigadores en biomedicina os coñecementos básicos, nas fases pre e pos xenotipado, necesarios para situar a investigación biomédica na era posxenómica onde os SNPs teñen e terán un papel moi relevante. As dúas xornadas programadas permitirán axudar a entender o xenotipado e grande escala como ferramenta útil para estudos de asociación de enfermidades complexas.
Cun número total de prazas de 30, o curso é de carácter gratuíto, polo que terán prioridade aqueles alumnos que non asistiron con anterioridade a cursos ou xornadas organizados por CeGen.