Fondo pesar polo falecemento de Jesús Pena Seijas

A Universidade de Santiago manifesta o seu fondo pesar polo falecemento de Jesús Pena Seijas, profesor ad honorem que desenvolveu o seu labor docente e investigador na Facultade de Filoloxía dende o ano 1970, onde impartiu docencia ininterrompidamente  ata o curso 2016-2017. A súa perda faise sentir moi fondamente no Departamento de Lingua e Literatura Españolas, Teoría da Literatura e Lingüística Xeral e no conxunto do centro, onde sempre mantivo unha estreita relación máis alá da profesional e deixa discípulos/as e amizades.

Jesús Pena Seijas era Catedrático de Lingua Española dende o 21 de setembro de 1983 e dende decembro de 2015 era membro correspondente da RAE en representación de Galicia. Ademais do labor docente e investigador, foi director do Departamento de Lingua Española, así como vicedecano e decano da Facultade de Filoloxía. Jesús Pena Seijas ten una traxectoria docente e investigadora relevante no seu campo de investigación específico, a morfoloxía do español, recollida en numerosas publicacións, e a través da participación e dirección de proxectos de investigación entre os que destaca MORFOGEN.