Investigadores da USC, referentes mundiais nos estudos arredor da demora diagnóstica do cancro oral

Un artigo que publica un grupo de investigadoras brasileiras da Universidade Estatal de Feira de Santana en Medicina Oral, Patología Oral, Cirugía Bucal, a revista española de maior impacto no eido da saúde oral, recoñece o traballo desenvolvido polo catedrático de Cirurxía Oral Juan Manuel Seoane Lestón, da Universidade de Santiago de Compostela, como referente mundial na investigación sobre demora diagnóstica do cancro oral.

O artigo analiza as publicacións científicas de primeiro nivel incluídas na base de datos Scopus desde 2002 ata abril de 2024, período no que viron a luz 532 artigos sobre o tema, dos cales 16 contaron coa participación de Juan Manuel Seoane, sendo o autor con maior número en publicacións en coautoría dos 2.320 que deron a coñecer nese período os resultados das súas investigacións, así como o terceiro máis citado en artigos nos que figura a súa coautoría. En segunda posición como coautor de artigos figura Pablo Varela Centelles, profesor asociado do Departamento de Cirurxía e Especialidades Médico-Cirúrxicas da USC e investigador do Servizo Galego de Saúde.

As conclusións do artigo sinalan que é evidente que no campo da diagnose do cancro oral hai lugar para estudos novos centrados en reducir o intervalo de diagnóstico, sendo algúns dos obxectivos clave para estudar os biomarcadores, a diagnose a través de imaxe ou a expresión xenética. O obxectivo do estudo foi achegar “información valiosa que pode axudar os investigadores e as institucións a aliñar as súas actividades investigadoras segundo temas emerxente, establecer colaboracións e atribuír recursos eficazmente”.