Futbolistas de equipos galegos conversan sobre as súas experiencias no Congreso Internacional sobre fútbol e psicoloxía
Liderado e intelixencia emocional e ‘Observar e analizar o xogo, como e para que?’ son os dous bloques temáticos de comunicación libres cos que comezará ás 9.00 horas o programa do martes 27 do II Congreso Internacional sobre Fútbol e Psicoloxía que se celebra na Facultade de Psicoloxía da USC. Deseguido, a partir das 10.30 horas, está prevista unha sesión sobre o fútbol base e a formación de futbolistas nas que intervirán Gustavo Grossi do River Plate de Arxentina; Macario Bravo, ex psicólogo do RC Deportivo da Coruña; e David Llopis do Levante Unión Deportiva.
Para completar a sesión matinal, está prevista unha quenda de intervencións arredor da participación, deportividade e desenvolvemento. Xa pola tarde, está prevista unha mesa de xogadores que contará coa participación de Borja Iglesias do RC Celta de Vigo, Javier Fernández ‘Bicho’ do RC Deportivo da Coruña e Edu Sosa do Pontevedra CF, coordinada polo adestrador nacional Luis Santiago. A continuará terá lugar unha sesión de pósteres e a partir das 18.00 horas os talleres que impartirán, entre outros, Toni Ardá, da Universidade da Coruña; Eduardo Covelo, do Celta; ou ‘ Luisito’ e Roberto Valdés, do Pontevedra CF.
Do luns 26 ao venres 30 a Universidade de Santiago acolle a segunda edición do Congreso Internacional sobre Fútbol e Psicoloxía, evento que “representa un paso histórico na análise do fútbol, do seus protagonistas e do seu entorno dende unha perspectiva científica, racional e universitaria”. Con estas palabras o coordinador do congreso, o profesor Constantino Arce, destaca a transcendencia do encontro, “unha idea innovadora da USC e a Federación Galega de Fútbol”, que ademais posúe carácter pioneiro xa que “non temos constancia de que existan antecedentes dunha acción formativa semellante realizada de maneira conxunta e coordinada entre unha universidade e unha federación de fútbol”.
O segundo Congreso Internacional sobre Fútbol e Psicoloxía pretende facer transferencia directa de coñecemento da universidade ao entorno do fútbol co ánimo de axudar a mellorar os niveis de rendemento, de benestar e satisfacción dos adestradores, xogadores, equipos directivos, arbitrais e familias. Para acadar os seus obxectivos exporanse preto dun cento de relatorios, 22 pósteres e 20 obradoiros. En total, acuden a Santiago expertos, investigadores e profesionais de nove países (España, Portugal, Arxentina, Colombia, Perú, Brasil, México, Estados Unidos e Cabo Verde), e estarán representadas 36 universidades e 35 clubs de fútbol.