O Programa A Ponte entre o Ensino Medio e a USC lanza unha nova edición dos Encontros na Zona USC nos que o estudantado preuniversitario poderá coñecer de primeira man a oferta docente e de servizos da Universidade de Santiago de Compostela. Esta iniciativa desenvolverase os días 3, 4, 5 e 6 de febreiro en Compostela. Os percorridos partirán das residencias universitarias Monte da Condesa e Burgo das Nacións ás 10.30 horas.
“Cada estudante pode escoller o percorrido que máis lle interese, sen ter que ir toda a clase xunta”, destacan dende o programa A Ponte. No formulario de inscrición Santiago, cada centro de Ensino Medio debe indicar, a partir do 16 de xaneiro, os datos do centro e dunha persoa acompañante así como o día da visita e o número de estudantes de cada percorrido. Nalgún caso existe a posibilidade de elixir un percorrido cun único centro (Facultade ou Escola) ou elixir un percorrido dese centro en combinación con outro.
En total, ofrécense 17 percorridos e a visita ás residencias universitarias Monte da Condesa e Burgo das Nacións. Dende o programa A Ponte salientan que “nesta actividade ofrécese aos estudantes de Ensino Medio unha oportunidade de contacto coa Universidade, visitando os centros dos Campus de Lugo e Santiago para recibir información directa dos estudos que organizan”. Na anterior edición participaron 6.242 estudantes de 119 centros (5.380 estudantes de 103 centros no Campus de Santiago).