A USC coordina un proxecto europeo para o desenvolvemento dun máster de matemática industrial en Asia central

A USC coordina o proxecto europeo ECCUM (Establishment of Computing Centers and Curriculum Development in Mathematical Engineering Master program) no que participan universidades de Uzbekistán, Kazakhstan, Eslovenia e Italia, co apoio do Cesga. A finalidade do proxecto será o desenvolvemento dun máster de alcance interuniversitario na zona de Asia central inspirado na experiencia docente da USC no ámbito da enxeñaría matemática e a matemática industrial así como o despregamento dunha rede de centros de cálculo.

O proxecto iniciará a súa actividade o vindeiro luns 1 de febreiro nunha sesión ás 10.00 horas no Salón de Graos da Facultade de Matemáticas que reunirá a representantes das entidades integrantes do proxecto e que presidirá o reitor Juan Viaño. Neste acto tamén intervirán a decana da Facultade, Victoria Otero Espinar, e a vicerreitora de Internacionalización, Almudena Hospido Quintana. Esta primeira xuntanza definirá a mecánica de traballo e a planificación de actividades para o primeiro ano de funcionamento, así como unha presentación e posta en común dos participantes. Na xornada do martes 2, os asistentes manterán un encontro con persoal técnico do Centro de Supercomputación de Galicia (Cesga).