Humanidades acolle unha exposición sobre a colección de moedas romanas do Museo do Castro de Viladonga

A Facultade de Humanidades do campus de Lugo da USC acolle nas súas instalacións ata finais de abril unha exposición sobre a colección numismática do Museo do Castro de Viladonga cedida polo propio Museo do Castro de Viladonga. Esta mostra, que se desenvolve baixo o título ‘A moeda romana como documento’, ofrece cumprida información sobre a colección de moedas acubilladas no Museo do Castro de Viladonga, elementos documentais que abranguen un amplo período cronolóxico que vai desde o século I antes de Cristo ata o século IV despois de Cristo. Os diversos paneis da mostra instalados na entrada da Facultade de Humanidades replican imaxes e aportan datos de moedas da etapa republicana e do alto imperio, tales como o son os denarios de prata, ases de Augusto e Tiberio, ases de bronce ou sestercios de bronce. As novas moedas acuñadas na etapa coñecida como Baixo Imperio, o período comprendido entre mediados do século III e do século V e que son as máis e mellor representadas no Museo do Castro de Viladonga, tamén ocupan un espazo destacado nesta mostra, que dá conta da importancia que teñen na colección numismática do Museo do Castro de Viladonga moedas como os Antonianos ou argenteus, folles, áureo ou sólidus, semisses... A exposición aberta este mes na Facultade de Humanidades sobre a colección numismática do Castro de Viladonga reproduce imaxes das distintas moedas de curso oficial durante as distintas etapas do imperio romano. Asemade, a mostra ofrece información detallada sobre algúns dos cambios monetarios producidos durante este período histórico.

Outro dos aspectos atractivos desta mostra sobre numismática romana e que vén podería entenderse como un elemento complementario da mesma, é a que atinxe á disposición de varios paneis con información sobre a orixe e a finalidade das moedas, a súa configuración e estrutura, así como doutros datos relativos ao proceso de fabricación e cuñaxe das moedas.