Patrimonio e conflitividade, un binomio a análise na Facultade de Humanidades

Entender que os procesos de patrimonialización, como calquera outro caso de construción social, implican un alto grao de disenso e incluso poden deparar conflitos, e toma en conciencia de que o patrimonio é un xerador de identidades locais, constitúen algúns dos obxectivos do curso de verán que se desenvolverá os días 25 e 26 de xuño na Facultade de Humanidades do campus de Lugo.

O seminario da Universidade de Verán 2015 da USC Patrimonio e conflitividade, un programa dirixido por Ana Cabana Iglesia e Elena Freire Paz, busca analizar e, no seu caso, dar resposta aos posibles conflitos que teñen na súa orixe o patrimonio cultural e natural, a través dos distintos relatorios incluídos no programa. O catedrático da USC Xaquín S. Rodríguez Campos abrirá cunha exposición sobre o Camiño de Santiago no imaxinario posmoderno a quenda de intervencións deste foro, que rematará cunha táboa redonda sobre sociedade civil e patrimonio. O prazo de inscrición neste curso da Universidade de Verán 2015, estruturado en 15 horas lectivas e que ofrece un máximo de 20 prazas, permanecerá aberto ata o venres 12 de xuño. As persoas interesadas poden inscribise a través da web da USC ou tamén nas dependencias da Área de Cultura, emprazadas na Vicerreitoría de Comunicación do campus de Lugo.