Sete problemas a resolver na XVIII Olimpíada Iberoamericana de Matemática Universitaria

Unha decena de estudantes da USC participan este sábado 7 nas probas da XVIII Olimpíada Iberoamericana de Matemática Universitaria que se desenvolverán na facultade de Matemáticas a partir das 10.00 horas. O certame xa vai pola cuarta edición, “en sintonía coa doce etapa que están a vivir as matemáticas, en particular, e as ciencias, en xeral, na USC”, explica o profesor Felipe Gago.

A OIMU está coordinada polo Centro de Investigación Matemática (CIMAT) de Guanajuato, México, e a convocatoria en España corre a cargo da Real Sociedade Matemática Española. Na USC, a Facultade de Matemáticas é a encargada da organización. A participación está aberta a todo o alumnado da USC, coa única condición de non contar con ningún titulo universitario.

As probas desenvolveranse ao longo de catro horas, nas que traballarán en sete problemas de dificultade variable.