Investigación e innovación responsable. Implicacións no marco da sustentabilidade e a cooperación internacional

A situación de emerxencia á que nos enfrontamos urxe un sólido compromiso que gravite sobre o coñecemento científico e tecnolóxico, pero eticamente guiado, dos retos que deben canalizar o desenvolvemento sustentable. A Axenda 2030 de Desenvolvemento Sustentable foi aprobada pola ONU no ano 2015, estrutura os grandes retos globais en 17 Obxectivos de Desenvolvemento Sostible, unha proposta que interpela aos estados, ás institucións públicas, ao sector privado e á cidadanía. Neste marco, a investigación e a transferencia teñen un papel determinante no liderado de procesos de transformación cara unha nova mirada onde a sustentabilidade sexa a premisa básica. As diferentes etapas de desenvolvemento dunha tese de doutoramento implican un proceso de aprendizaxe sobre os procedementos de investigación e a posibilidade de abrir unha fonda reflexión sobre os fins e as achegas de cada traballo. Por todo isto, o curso pretende abrir un ámbito de reflexión sobre a inclusión da sustentabilidade, a cooperación internacional e, de ser o caso, os ODS nos traballos de tese que se estean a realizar. A tarefa final está encamiñada a analizar as capacidades de cada investigación neste ámbito.