As competencias informacionais –en adiante CI-son o conxunto de coñecementos, habilidades, actitudes e condutas que capacitan aos individuos para recoñecer cando necesitan información, onde localizala, como avaliar a súa idoneidade e darlle o uso adecuado de acordo co problema que se lles formula.
Por que son necesarias as CI?
Son varios os factores determinantes da necesidade da adquisición destas competencias:
- Incremento exponencial da información científica.
- Desenvolvemento das TIC.
- Novo modelo de ensino-aprendizaxe implantado na Universidade, establecemento dunha cultura da calidade.
- Unha sociedade cambiante que require dunha mellora continua a través dunha aprendizaxe ao longo de toda a vida.
O mundo laboral e a sociedade, en xeral, demandan da Universidade a formación de persoas capaces de afrontar estes retos e de desenvolverse no seu rol social e profesional cun eficaz desempeño das tarefas específicas da súa profesión, pero tamén daquelas outras que lles capaciten para liderar, para comunicar e para relacionarse cos demais, facendo uso das TIC.
Por que a BUSC asume esta formación?
O Plan estratéxico 2011-2020 establece o obxectivo de potenciar a orientación dos servizos académicos á mellora dos procesos de ensino-aprendizaxe, para o que determina converter a BUSC nun centro de recursos para a docencia, a aprendizaxe e a investigación.
A Biblioteca Universitaria recolle o mandato da USC e establece, como un dos seus obxectivos estratéxicos, “contribuír á adquisición de competencias informacionais na comunidade Universitaria”.
A quen vai dirixida e como se desenvolve a formación en CI?
As Competencias en Información son unha competencia transversal.
A BUSC contribúe á súa adquisición impartindo Cursos de Formación dirixidos a todos os membros da comunidade universitaria.
Para o alumnado, ofértanse 3 niveis:
- Básico, dirixido ao alumnado de primeiros cursos de grao.
- Avanzado, dirixido ao alumnado dos últimos cursos do grao e pensado para axudar na realización do TFG.
- Experto, dirixido ao alumnado de posgrao.
O PDI e o PAS teñen acceso á formación en competencias en información a través dos plans de formación que a USC oferta para cada colectivo.
O formato dos cursos é en liña (a través do Campus Virtual da USC), aínda que adoitan levar consigo clases presenciais e prácticas para reforzar a adquisición das competencias.
Que competencias se traballan?
A UE integra as CI dentro da competencia dixital, e define esta como unha das oito competencias chave que todo estudante debe ter adquirido ao rematar a súa formación académica.
O documento europeo DIGCOMP establece 21 competencias dixitais, repartidas en 5 Áreas:
Área 1: Información e tratamento de datos
- C1. Navegación, procura e filtrado de información, datos e contidos dixitais.
- C2. Avaliación de información, datos e contidos dixitais.
- C3. Xestión de información, datos e contidos dixitais.
Área 2: Comunicación e colaboración
- C4. Interacción mediante tecnoloxías dixitais.
- C5. Compartir mediante tecnoloxías dixitais.
- C6. Participación social mediante tecnoloxías dixitais.
- C7. Colaboración mediante tecnoloxías dixitais.
- C8. Netiqueta.
- C9. Xestión da identidade dixital.
Área 3: Creación de contido dixital
- C10. Desenvolvemento de contidos dixitais.
- C11. Integración e reestruturación de contido dixital.
- C12. Dereitos de autor e licenzas.
- C13. Configuración e personalización de aplicacións e programas informáticos.
Área 4: Seguridade
- C14. Protección de dispositivos.
- C15. Protección de datos persoais e privacidade.
- C16. Protección da saúde e o benestar.
- C17. Protección da contorna.
Área 5: Resolución de problemas
- C18. Resolución de problemas técnicos.
- C19. Identificación de necesidades e respostas tecnolóxicas.
- C20. Usar a tecnoloxía dixital de forma creativa.
- C21. Identificación de lagoas na competencia dixital.
¿Podo obter créditos con este curso?
A USC recoñece esta actividade con 1 crédito ECTS. A súa imputación no expediente do alumnado apto é automática —sen necesidade de solicitude previa— cando se cumprimenten as actas do curso. Non se recoñecerá o crédito a aquelas persoas que realicen un curso de competencias en información que non sexa o propio da súa titulación.
A superación dos cursos que se imparten nun grao (niveis básico e avanzado) permiten obter cadanseu crédito ECTS (2 créditos en total).
A superación dos cursos impartidos en posgrao (nivel experto) proporciona un diploma emitido pola USC que acredita unha formación con aproveitamento de 25 horas.
Cando e onde fago a matrícula?
A matrícula faise a través da Secretaría Virtual da USC en “Actividades cursos e probas" » "Oferta" » “Cursos de Competencias en Información (CCI)” dentro dos prazos de matriculación e no curso que corresponda a súa titulación.