A mostra, que permanecerá aberta ao público na Biblioteca de Psicoloxía e Ciencias da Educación do 13 ao 29 de xaneiro, presenta oito personalidades galegas, de nacenza ou adopción, que foron pioneiras dalgún xeito naqueles eidos nos que desenvolveron a súa actividade.
A Biblioteca de Psicoloxía e Ciencias da Educación (Campus Norte) acolle do 13 ao 29 de xaneiro a mostra "8 mulleres galegas que moveron os marcos", que permanecerá exposta na sala de lectura da biblioteca. A exposición presenta oito personalidades galegas, de nacenza ou adopción, que foron pioneiras dalgún xeito naqueles eidos nos que desenvolveron a súa actividade. Son mulleres con moi diversas traxectorias vitais, cuxo denominador común é ter sido quen de internarse en territorios reservados, polo común, aos homes. A maiores na biblioteca ofrécese unha escolma de obras doutras mulleres destacadas no ámbito da Educación.
As protagonistas da mostra son:
- María Luz Morales, primeira directora dun xornal en España.
- María Barbeito, educadora que achegou precozmente ao noso país as máis modernas teorías pedagóxicas que se estaban a xestar en Europa.
- Ángela Ruiz Robles, mestra e inventora dun dispositivo precursor do libro electrónico.
- Elisa Patiño, a primeira aviadora galega e unha das primeiras en Europa.
- Áurea Rodríguez, a primeira gaiteira da que temos noticia.
- Concepción Pérez Iglesias, tamén mestra, primeira alcaldesa de Galicia e unha das primeiras de España.
- María Wonenburger, investigadora en álxebra e primeira muller española que obtivo unha bolsa Fullbright.
- Maruxa Villanueva, actriz, cantante e emprendedora teatral en Galicia e alén do Atlántico.
Podes atopar máis información na guía virtual da BUSC sobre a exposición.