Convocatoria de prazas de aloxamento do SUR para membros da comunidade universitaria durante o período comprendido entre o 1 de xuño e o 31 de agosto de 2025.
Nesta convocatoria ofértanse prazas en todas as residencias universitarias e colexios maiores do SUR, agás no mes de agosto que só permanecerán abertos os centros necesarios en función da demanda de prazas.
Solicitantes
Poderán solicitar aloxamento nesta convocatoria:
- Os/As que foron residentes ou colexiais do SUR durante a convocatoria ordinaria do curso 2024- 2025.
- Os/as estudantes que vaian realizar prácticas ou actividades académicas durante o verán e o xustifiquen documentalmente.
- As persoas que realicen traballos de investigación, de administración ou laborais que impliquen a necesidade de permanencia continuada en Santiago de Compostela (sectores de terceiro ciclo, investigadores en formación e persoal da USC).
- Quen vaia participar en cursos ou congresos organizados pola USC.
- Membros da comunidade universitaria (nacional ou estranxeira).
Quedan excluídos/as desta convocatoria os/as residentes que cometeron faltas graves e foron sancionados/as coa expulsión definitiva durante a súa estadía no SUR, os/as que cederon o uso total ou parcial da habitación a outras persoas sen dereito a praza, así como os/as que a día 1 de xuño de 2025 tiveran cantidades pendentes de pagamento.
Para a ampliación de estancia para residentes e colexiais do curso 2024-2025 que desexen continuar dende o 1 de xuño en diante no centro no que están residindo, poderán facer a solicitude ata as 14.00 h do 26 de maio de 2025.
Para o resto das persoas interesadas en reservar días soltos do verán, foran residentes ou non durante o curso, o prazo de solicitude permanecerá aberto dende o 28 de maio ata as 14.00 h do 21 de agosto de 2025
Os/As residentes ou colexiais do SUR:
• Para solicitar a ampliación do período de aloxamento ata o 15 de xullo non precisarán ningunha xustificación.
• Para solicitar a ampliación do aloxamento ata despois do 15 de xullo e como máximo ata o 31 de agosto deberán acreditar documentalmente a necesidade de permanecer no SUR.
As persoas que veñan participar nalgunha actividade organizada pola USC deberán achegar o documento que acredite este feito.
As persoas que formen parte dunha comunidade universitaria (nacional ou estranxeira) deberán presentar a documentación acreditativa da súa universidade.
A solicitude deberá cumprimentarse mediante o formulario accesible por vía telemática que figura na páxina web:
https://www.usc.gal/gl/servizos/area/residencias/acceso-servizo-univers…
achegando a documentación xustificativa de cada caso.
Os/as residentes e colexiais do curso 2024-2025 que soliciten a ampliación do seu período de aloxamento manterán a cota que tiñan asignada.
Os/as estudantes que foron residentes ou colexiais durante todo o curso 2024-2025, e que obtiveron a súa praza pola Convocatoria ordinaria, poderán solicitar aloxarse en días soltos para realizar actividades académicas. O prezo do cuarto individual é de 12 € (IVE incluído) por día. Poderán aloxarse en cuarto dobre cando as dúas persoas solicitantes foran residentes ou colexias da citada Convocatoria ordinaria. O prezo do cuarto dobre é de 20 € (IVE incluído) por día. Estes cuartos só se poderán reservar completos.
Para os estudantes non relacionados no punto anterior que precisen aloxarse días soltos para realizar actividades académicas o prezo é de 22 € (IVE incluído) por día en cuarto individual.
Poderán aloxarse en cuarto dobre cando as dúas persoas solicitantes sexan estudantes. O prezo é de 33 € (IVE incluído) por día en cuarto dobre. Estes cuartos só se poderán reservar completos.
Para o resto das solicitudes o prezo é de 33 € (IVE incluído) por día en cuarto individual e 53 € (IVE incluído) por día en cuarto dobre. En calquera caso, os cuartos dobres só se poderán reservar completos.
Para as persoas que foron colexiais ou residentes durante o curso académico 2024-2025 e soliciten unha ampliación do seu período de aloxamento utilizarase o sistema de cobro do curso académico.
No resto dos casos, o pagamento deberá facerse preferentemente con tarxeta de crédito ou de débito mediante a pasarela de pago seguro.
No caso de atoparse con algún problema que lle impida pagar co sistema de tarxeta mencionado, poderán realizar unha transferencia bancaria, á conta da Universidade de Santiago de Compostela na entidade: Abanca. Oficina de Organismos. Rúa Montero Ríos, 7-15706-Santiago de Compostela (A Coruña). Código internacional de conta bancaria IBAN: ES53 2080 0388 28 3110001172 e Código de identificación bancaria (Swift): CAGLESMMXXX. Nos ingresos por transferencia bancaria deberán indicar como concepto “o número de solicitude, apelidos e nome da persoa solicitante”, e subir o xustificante da transferencia á aplicación telemática de solicitudes.
A anulación da reserva só suporá a devolución do importe cando se faga como mínimo sete días antes da data de entrada.
A adxudicación da praza é automática, sempre e cando a solicitude veña debidamente xustificada, e o pago se realice con tarxeta.
Servizo Universitario de Residencias (SUR)
- Pavillón de Estudantes
- Rúa de Lope Gómez de Marzoa, 4. Campus Vida , 15782Santiago de Compostela
- 881 814 525
- 881 815 246
- 881 814 560
- sur [at] usc.es