A Facultade de Psicoloxía da USC é un centro que se caracteriza polo compromiso coa calidade da súa docencia (en 2019 foi recoñecida coa Acreditación Institucional outorgada polo Consello de Universidades) e da súa investigación, e pola súa decidida aposta por fomentar a vinculación entre o contexto académico e o ámbito profesional da psicoloxía. A estes obxectivos habería que engadirlles o noso compromiso co contexto social e coa promoción da igualdade e da sustentabilidade como valores democráticos que deben guiar todas as actuacións dunha institución de educación pública.