O Instituto de Acuicultura (IA) creouse en 1998 co obxectivo de ser un “Centro de Investigación, desenvolvemento, innovación, transferencia e formación en campos relacionados coa biotecnoloxía aplicada á acuicultura e á conservación dos recursos da acuicultura”. Os grupos que o compoñen abarcan aspectos de I+D relacionados coa Biotecnoloxía en Acuicultura, incluída a Xenética, a Microbioloxía, a Patoloxía, a Inmunoloxía, a Fisioloxía e a Bioquímica, aplicados ás dúas áreas principais da acuicultura: a piscicultura e o cultivo de invertebrados (moluscos e crustáceos), incluíndo as poboacións cultivadas e salvaxes.
A súa produtividade queda amosada nos máis de 300 proxectos de investigación e contratos con empresas no período 2012-2019, así como as máis de 400 publicacións en revistas JCR con índices de impacto de ata 7. No ámbito da formación, o IA coordina un mestrado oficial e un programa de doutoramento; tamén organiza cursos de formación continua para profesionais e técnicos da administración na contorna rexional.
É no ámbito dos servizos tecnolóxicos onde se ofertan e executan, tanto no ámbito rexional como nacional e internacional, os servizos fundamentais relacionados coas áreas de microbioloxía, patoloxía e xenética.
Contacto
Instituto de Acuicultura
Constantino Candeira s/n Campus Vida.
Universidade de Santiago de Compostela
15782 - Santiago de Compostela