Máis de 130 universitarios participan no III Foro de Emprego no Campus de Lugo

A Facultade de Administración e Dirección de Empresas do Campus de Lugo acolle este xoves 26 o III Foro de Emprego da USC, que se vén de celebrar tamén na Facultade de Ciencias Económicas e Empresariais de Santiago, co obxectivo de ofrecer aos universitarios recursos de utilidade para a súa inserción ó mercado laboral nas mellores condicións posibles.
A inauguración oficial do Foro no campus lugués tivo lugar nun acto no que participaron a vicerreitora adxunta de Infraestruturas e Servizos, Marta Miranda; o vicerreitor adxunto de Investigación e Proxección Exterior, Jesús Casabiell; o decano da Facultade de Administración e Dirección de Empresas, Luís Gago González; e a concelleira de Economía e Emprego do Concello de Lugo, Sonia Méndez.
No marco deste Foro de Emprego, profesionais de oito empresas e organismos públicos, como Caixa Galicia, Kiabi, Lug02, o Concello de Lugo ou o IGAPE, achegan o seu traballo aos universitarios a través de conferencias e nos seus propios stands, onde mesmo lles ofrecen a posibilidade de deixarlles os currículos para participar en futuros procesos de selección. Ademais, os máis de 130 inscritos no Foro do campus lugués poden participar en obradoiros nos que afondan nas ferramentas e métodos para a busca dun posto de traballo.
O Foro de Emprego, organizado pola Vicerreitoría de Comunidade Universitaria e Compromiso Social, a través dos seus Servizos de apoio ao emprendemento e o emprego (SAEE), supón unha grande oportunidade para os estudantes e recén titulados, xa que contactan directamente coas empresas para coñecer o que requiren aos seus candidatos.