2015, un bo ano para deixar de fumar

Co comezo de cada novo ano moitas persoas se marcan o firme propósito de deixar de fumar, pero non todas o conseguen. Para elas a Unidade de Tabaquismo e Trastornos Aditivos da Facultade de Psicoloxía da USC que dirixe o catedrático Elisardo Becoña ofrece distintos programas e tratamentos psicolóxicos que ao longo dos últimos 30 anos demostraron funcionar eficazmente. Aínda que aumentara notablemente a conciencia social sobre a necesidade de deixar de fumar situando nun 24% a porcentaxe de poboación adulta que fuma a diario, non todo o mundo é capaz de deixar o tabaco por si só e por iso, recalcan dende a Unidade, “acudir a profesionais especializados no tratamento de fumadores e das adicións é unha garantía de éxito”. O profesor Becoña leva traballando desde hai tres décadas na Facultade de Psicoloxía na loita contra o consumo de tabaco ofrecendo tratamentos psicolóxicos a un total de 14.000 persoas fumadoras (entre 230 e 250 novas cada ano), cunha porcentaxe de éxito dúas ou tres veces maior que o placebo ou o autoabandono. O máis coñecido, o seu Programa para deixar de Fumar,caracterízase por proporcionar aos fumadores un conxunto sinxelo de estratexias que van seguindo semana a semana para debilitar paulatinamente as compoñentes fisiolóxica (dependencia da nicotina), psicolóxica (hábito) e social (presión ao consumo). O equipo de profesionais que traballan nese servizo pon dende hai anos especial atención á preocupación do fumador no proceso de abandono de maneira que lle ofrecen distintos programas psicolóxicos asociados que permiten tratar de maneira integral a quen desexe deixar de fumar. Desa maneira se incrementan as probabilidades de éxito “con quen ten medo a engordar ou mesmo con quen chega á Unidade con baixo estado de ánimo”, explica Becoña. Todas as persoas interesadas en deixar de fumar poden anotarse desde xa e ata finais deste mes de xaneiro na Unidade da USC a través do teléfono 881813939 ou por correo electrónico a elisardo.becona [at] usc.es (elisardo[dot]becona[at]usc[dot]es).