Aberta a matrícula nas actividades físico-deportivas do curso 2022-23

O curso deportivo 2022-23 iníciase este xoves 1 de setembro na USC coa apertura do prazo de inscrición de moitas das súas actividades. O amplo catálogo de propostas, xa dispoñible na web da Área Deportiva, inclúe tanto sesións dirixidas, como deportes de práctica libre e tamén competicións en ligas en campionatos universitarios, alén das actividade deportivas federadas a través do Club USC.

Así, no Campus de Santiago, as persoas usuarias poderán practicar ao longo do curso actividades acuáticas, aeróbicas e de acondicionamento físico, e disciplinas como o tenis, o atletismo, o taekwondo, o ioga, ou a ximnasia terapéutica, entre outras moitas. O inicio das clases das actividades físico-deportivas depende de cada unha delas, pero as primeiras arrancan o 12 de setembro. Con todo, as persoas usuarias xa poden facer uso dende este xoves das instalacións da USC para a práctica libre, reservando espazos como a piscina e o estadio de atletismo, o campo de fútbol, o pavillón polideportivo ou as pistas de tenis. A oferta deportiva para o Campus de Lugo inclúe actividades aeróbicas e de acondicionamento físico, e outras prácticas como o ioga, o pilates, ou a autodefensa persoal. Ademais, en ambos os dous Campus, as persoas interesadas poderán enrolarse en actividades de sendeirismo coas que percorrer distintos lugares de Galicia. O calendario de rutas e actividades de montaña supera a vintena de propostas e arranca con dúas saídas no mes de setembro: dende a Pobra do Caramiñal a Ribeira e dende Arnela ao Castro de Baroña.

A data de inicio das prácticas de cada actividade, os seus horarios e as tarifas aplicables, tanto para integrantes da comunidade universitaria como para persoas externas, están dispoñibles na web da Área Deportiva.

Proceso de inscrición

O primeiro paso para acceder á maior parte dos servizos é rexistrarse como persoa usuaria da Área Deportiva a través da páxina web. Este rexistro faise de maneira gratuíta e por unha soa vez, xa que ten carácter indefinido. Distingue dúas tipoloxías de acceso, para integrantes da comunidade universitaria, con preferencia en prazos de inscrición e tarifas reducidas, e persoas externas á USC. Unha vez coas súas credenciais, as persoas rexistradas poderán efectuar a inscrición en todas as actividades xa abertas así como facer a reserva dos espazos do seu interese.

Coa programación deportiva do curso 2022-23, a USC dá continuidade ás propostas de anos anteriores e ao compromiso de fornecer a comunidade universitaria de propostas de saúde, entretemento e competición accesibles para todo tipo de persoas usuarias.