Aberto o prazo de inscrición para participar no III Foro de Emprego da USC

A USC abriu o prazo de inscrición para asistir ao seu III Foro de Emprego que, ao igual que na edición anterior, se desenvolverá nos dous campus: os días 24 e 25 na Facultade de Ciencias Económicas e Empresariais do campus de Santiago, e o día 26 na Facultade de Administración e Dirección de Empresas de Lugo.
O Foro de Emprego, organizado pola Vicerreitoría de Comunidade Universitaria e Compromiso Social, diríxese a estudantes de últimos cursos e a recén titulados, co obxectivo de que poidan contactar con responsables de selección de empresas, o que supón unha grande oportunidade de coñecer de primeira man o que as diversas firmas buscan nos seus candidatos.
USC aposta pola celebración de eventos deste tipo para seguir afondando no seu compromiso de ofrecer aos universitarios alternativas válidas que faciliten o seu acceso ao mercado laboral nas mellores condicións posibles. Ao mesmo tempo, neste foro levaranse a cabo diversos procesos de selección así como presentacións de distintas empresas e entidades.