A aula da USC de simulación dunha oficina de farmacia, premiada por Correo farmacéutico

A Aula-Farmacia USC-COFAGA-COFANO, a primeira aula de simulación dunha oficina de farmacia nunha universidade pública, acaba de ser recoñecida co premio á mellor iniciativa de formación por Correo farmacéutico. Recolleu o premio en Madrid a decana da Facultade de Farmacia, Isabel Sandez Macho, que estivo acompañada polos presidentes de Cofano e Cofaga, Manuel Muradás e Miguel Reviejo, respectivamente. A Aula é un espazo no que se reproducen as instalacións e equipamentos máis habituais dunha farmacia e no que se desenvolve a docencia práctica. Nela organízanse actividades tendentes a mellorar a formación teórica e práctica do alumnado da Facultade de Farmacia da USC, pudendo utilizarse, ademais, para a formación práctica dos servizos profesionais desempeñados polo farmacéutico comunitario e a xestión das oficinas de farmacia, así como accións de divulgación relacionadas na USC. Esta aula, en marcha dende o pasado curso, está totalmente equipada de maneira que representa situacións reais de dispensacións, seguimento farmacoterapéutico e farmacovixilancia. As instalacións e equipamentos específicos así como os necesarios para impartir a formación achéganos Cofaga e Cofano.