Un camiño para a descentralización de Portugal
A Portugal quédalle un longo camiño por percorrer en materia de descentralización económica. Así o confirma a investigación de Vicente Antonio Fernándes Seixas, doutor en Economía e Empresa pola USC e especialista en orzamento e finanzas públicas, na que estudou como mellorar a xestión das finanzas municipais e orzamentos públicos de Portugal.
O traballo analiza a xestión dos fondos dos concellos portugueses e doutros ingresos e gastos, utilizando doce indicadores de rendemento financeiro e orzamentario a nivel municipal. Ademais, agrupa os municipios en base a quince criterios económicos, políticos, sociais, xeográficos e demográficos. Para corroborar a utilidade, aplicabilidade e solidez dos indicadores propostos, a investigación inclúe un estudo de caso no que os aplica nun concello concreto.
O obxectivo da investigación é que “o conxunto de indicadores e a súa análise integrada sexan empregados no futuro polas institucións de inspección, control e supervisión dos concellos como unha ferramenta de apoio á vixilancia e xestión das finanzas municipais, co fin de identificar as tendencias, os riscos, as desviacións da planificación e a aplicación de medidas correctivas”, explica Fernándes. “Tamén poden axudar a evitar asimetrías na asignación de fondos aos gobernos locais”, engade.
O autor destaca “a desigualdade entre a rexión de Lisboa e o resto do país”, e sinala que se aprecia un “patrón” que divide aos municipios en dous tipos. Os primeiros son aqueles “emprazados na costa e nas grandes áreas metropolitanas, que son os que mellor aproveitan os recursos” e que, polo tanto, dependen menos da Administración central. Por outra banda, aqueles “de interior, con poboación inferior a 10.000 habitantes, que son os que máis invisten e, aínda realizando unha boa xestión, dependen inevitablemente das transferencias do goberno central”.
O estudo, recollido na tese titulada ‘Análise do comportamento orzamentario e financeiro dos municipios do Portugal continental’, foi realizado no Programa de Doutoramento en Economía e Empresa da USC, e dirixida por María del Carmen Sánchez Carreira, profesora do Departamento de Economía Aplicada.