A Cátedra do Camiño lanza a novena edición do seu premio de investigación sobre a ruta xacobea

A Cátedra do Camiño de Santiago e as Peregrinacións da Universidade de Santiago, froito dun convenio con Turismo de Galicia e a Catedral de Santiago, impulsa a novena edición do seu premio de investigación.

O galardón diríxese ao persoal investigador de nacionalidade española ou estranxeira que teña publicado durante o ano 2025 un traballo en formato de libro de autoría individual ou colectiva, ou defendido unha tese de doutoramento, que tivera como tema de estudo o Camiño de Santiago ou as Peregrinacións.

Sendo condición indispensable que o traballo non teña obtido ningún premio anteriormente, outorgarase un único galardón en metálico de 3.000 euros para libros publicados con ISBN e teses de doutoramento inéditas. No caso de que houbera máis de un traballo premiado, o importe do premio repartirase en partes iguais para cada un deles.

As  persoas  interesadas deberán  presentar  a  súa  solicitude  na  sede  electrónica  da  Universidade. O prazo de presentación de candidaturas rematará o 11 de maio.

O xurado do presente premio estará formado polo director da cátedra e os dous co directores e, de estimarse oportuno, por ate dous asesores designados polo director da cátedra en función da lingua na que se presenten os textos.