A catedrática da USC Peregrina Quintela, premio María Josefa Wonenburger
A catedrática de Matemática Aplicada da USC Peregrina Quintela Estévez recolleu hai uns días o Premio María Josefa Wonenburger Planells 2016, que concede a Xunta de Galicia a mulleres cunha traxectoria relevante nos eidos das ciencias e da tecnoloxía. No acto de entrega que tivo lugar no Hostal dos Reis Católicos, Quintela reclamou das entidades responsables “fórmulas estables para frear a desaceleración científica que comezou coa crise”.
Peregrina Quintela está especializada en modelado matemático, análise matemática e simulación numérica en modelos de física, enxeñaría e ciencias aplicadas. Durante a súa carreira combinou a dedicación á ensinanza, investigación e a transferencia de coñecementos e a xestión. Na actualidade é ademais presidenta da Rede Española Matemática-Industria (math-in) e directora do Instituto Tecnolóxico de Matemática Industrial (ITMATI).
Dez Mulleres, cinco delas da USC
O premio leva o nome da investigadora e matemática galega María Josefa Wonenburger, unha auténtica pioneira e referente feminino internacional no ámbito das ciencias. Dende a súa creación, foron merecedoras deste recoñecemento mulleres que souberon adiantarse ao seu tempo e que abriron e abrirán camiños a moitas outras. Dos dez premios concedidos ata hoxe, cinco foron para profesoras da USC.
A primeira premiada foi Inmaculada Paz Andrade, catedrática emérita de Física Aplicada da Universidade de Santiago; un ano despois recibiuno María Teresa Miras Portugal, catedrática de Bioquímica e Bioloxía Molecular na Complutense de Madrid; e no ano 2009 Marisol Soengas González, directora do Grupo de Melanoma do Centro Nacional de Investigacións Oncolóxicas.
En 2010 a premiada foi Carmen Navarro Fernández-Balbuena, xefa do servizo de Anatomía Patolóxica no Complexo Hospitalario Universitario de Vigo; en 2011 foi Ofelia Rey Castelao, catedrática de Historia Moderna da USC; e en 2012 María Tarsy Carballas Fernández, edafóloga, profesora da USC e investigadora do Consello Superior de Investigacións Científicas.
En 2013 a galardoada foi María José Alonso Fernández, catedrática de Farmacia e Tecnoloxía Farmacéutica da USC, e en 2014 o premio foi para a catedrática de Enxeñaría de Telecomunicación, Carmen García Mateo. Finalmente, o ano pasado a premiada foi a arquitecta Isabel Aguirre de Úrcola.