Comeza a segunda fase da Campaña de Doazón de Sangue na Universidade

O Servizo de Participación e Integración Universitaria da USC da Vicerreitoría de Comunidade Universitaria e Compromiso Social acaba de pór en marcha a segunda fase da Campaña de Doazón de Sangue na Universidade. Durante esta semana e a que vén se impartirán charlas informativas e se habilitarán unidades móbiles en facultades e escolas.
O primeiro dos centros ao que poden acudir os universitarios para doar é a Facultade de Farmacia, que este mércores 26 dispón dunha unidade móbil diante do edificio. Para o campus do centro histórico de Compostela este xoves 27, de 10:00 a 14.30 e de 15.30 á 21.00 horas, emprazarase unha unidade de doazón na aula 2 da Facultade de Filosofía.
Xa do martes, 1 de abril, ata o xoves 3 a Facultade de Medicina e Odontoloxía contará cunha unidade móbil diante do centro que permanecerá activa de 9:30 a 14:30 e de 15:30 a 21:00 horas.