Comeza a súa actividade o proxecto Enerwater, primeira acción do programa Horizonte 2020 que coordina a USC

A Escola Técnica Superior de Enxeñaría de Santiago (ETSE) acollerá este venres 27 a xuntanza de lanzamento de Enerwater, primeira acción do programa Horizonte 2020 que coordina a USC, e acrónimo do proxecto ‘Método estándar e unha ferramenta en liña para a avaliación e mellora da eficiencia enerxética das plantas de tratamento de augas residuais’. A profesora Almudena Hospido, integrante do grupo de Enxeñaría Ambiental e Bioprocesos, coordina o proxecto. O reitor Juan Viaño presidirá esta primeira xuntanza do proxecto nunha sesión ás 9.00 horas no Salón de Actos da ETSE. ENERWATER é unha actividade proxectada para os vindeiros tres anos que involucra nove socios, entre universidades e empresas, de Alemaña, Italia, Reino Unido e España. Na actualidade, os estudos realizados apuntan a que as plantas de tratamento de augas residuais representan máis do 1% do consumo de electricidade en Europa, unha das maiores porcentaxes de uso de enerxía entre as industrias públicas. Estas cifras sinalan o punto de partida de Enerwater, que buscará definir ferramentas de medición que cuantifiquen o consumo enerxético destas plantas e elaborar normas para comparar e, finalmente, optimizar o seu funcionamento. Dada a antigüidade de boa parte dos centros europeas dedicados ao tratamento de augas residuais, os integrantes do proxecto prevén unha importante redución do consumo enerxético. Neste senso, as iniciativas a desenvolver entroncan coa actividade que desenvolve o grupo de Enxeñaría Ambiental e Bioprocesos da USC en cuestións como a cuantificación e a redución das emisións directas e indirectas de gases de efectos invernadoiro en diversos sectores industriais.